নেশ্যনেল ডেস্ক, ৮ নৱেম্বৰ: ছত্তিশগড়ৰ চুকমা জিলাৰ লিংগালাপল্লীস্থিত চিআৰপিএফৰ ৫০ বেটেলিয়নৰ শিবিৰত গুলীচালনা কৰিলে খোদ চিআৰপিএফ জোৱানে । সহকৰ্মীৰ গুলীত নিহত হ'ল ৪ জন জোৱান আৰু আহত হ'ল ৩ জন জোৱান । সোমবাৰে পুৱা তেলেংগানা-ছত্তিশগড় সীমান্তত থকা শিবিৰটোত এই ঘটনা সংঘটিত হয় । দীপাৱলীৰ সময়ত ছুটী নোপোৱাক লৈ বিবাদ হোৱাৰ পাচতে চি আৰ পি এফ জোৱানজনে এনেদৰে সহকৰ্মীলৈ লক্ষ্য কৰি গুলীচালনা কৰে ।
এই ঘটনাৰ পাচতে আহত জোৱানসকলক ততাতৈয়াকৈ তেলেংগানাৰ ভদ্ৰাচলমত থকা এখন চিকিৎসালয়লৈ নিয়া হয় । চিকিৎসাধীন হৈ থকা জোৱানকেইজনৰ অৱস্থা সংকটজনক বুলি চিকিৎসকে জানিবলৈ দিছে । ইফালে, গুলীচালনা কৰা জোৱানজনৰ বিৰুদ্ধে কি ব্যৱস্থা গ্ৰহণ কৰা হৈছে সেয়া এতিয়াও জানিব পৰা হোৱা নাই ।
আতৰ্কিতে হোৱা এই আক্ৰমণত জোৱানসকলে নিজৰ সুৰক্ষাৰ বাবে কোনো সুযোগেই পোৱা নাছিল । খঙৰ ভমকতে জোৱানজনে এনেদৰে গুলীচালনা কৰিছিল বুলি জানিব পৰা গৈছে ।
লগতে পঢ়ক:ত্ৰিপুৰা নগৰ পালিকাৰ নিৰ্বাচনৰ বাবে 821 খন মনোনয়নক বৈধতা প্ৰদান
