গুৱাহাটী, 17 মে’: ৰাজ্যত পুনৰ সংঘটিত হৈছে কৰ্তব্যৰত আৰক্ষীক আক্ৰমণৰ ঘটনা ৷ পুনৰ এবাৰ কৰ্তব্যৰত আৰক্ষীক আক্ৰমণ উদণ্ড যুৱকৰ ৷ খোদ আৰক্ষী চকীৰ ভিতৰতে কৰ্তব্যৰত আৰক্ষীক আক্ৰমণ কৰি জে’ললৈ যাব লগা হ’ল তিনি উদণ্ড যুৱক ৷ এই ঘটনাই এতিয়া চাঞ্চল্যৰ সৃষ্টি কৰিছে ৷
দৰঙৰ দলগাঁৱৰ বেছিমাৰী আৰক্ষী পহৰা চকীত কৰ্তব্যৰত আৰক্ষীক আক্ৰমণৰ দৰে এক দুৰ্ভাগ্যজনক ঘটনা ঘটিছে ৷ এই ঘটনাই দলগাঁও-ওদালগুৰিত ব্যাপক চাঞ্চল্যৰ সৃষ্টি কৰিছে ৷ ঘটনাৰ বিৱৰণ অনুসৰি, বেছিমাৰী আৰক্ষী পহৰা চকীলৈ এক গোচৰ সন্দৰ্ভত সোধ-পোচৰ বাবে আৰক্ষীয়ে আনিছিল আৰ্শ্বাদ আলী নামৰ এজন যুৱকক ৷
সোধ-পোচৰ বাবে আটকাধীন যুৱকজনক পহৰা চকীত কিছু সময় বহাই থয় আৰক্ষীয়ে ৷ তাতেই খৰ্গহস্ত হৈ পৰে আৰ্শ্বাদ আলী নামৰ অভিযুক্ত যুৱকজনৰ লগত যোৱা আন দুজন যুৱক ৷
অভিযুক্তক বহাই থোৱাক লৈ বাহাৰুল ইছলাম আৰু ইছমাইল হুছেইন নামৰ উদণ্ড যুৱক দুজনে কৰ্তব্যৰত আৰক্ষীৰ সৈতে প্ৰথমতে তৰ্কত লিপ্ত হয় ৷ লগতে পৰৱৰ্তী সময়ত আৰক্ষীক শাৰীৰিকভাৱে আক্ৰমণ কৰাৰ ঘটনা ঘটে ৷ ঘটনা সন্দৰ্ভত দলগাঁও থানাৰ গোচৰ নম্বৰ 105/24 ৰ IPC 294/353/323/307/506/34 ৰ অধীনত গোচৰ ৰুজু কৰি আৰ্শ্বাদ আলী, বাহাৰুল ইছলাম আৰু ইছমাইল হুছেইন তিনিওটা অভিযুক্তক জে’ললৈ প্ৰেৰণ কৰে ৷
উল্লেখযোগ্য যে তিনিওটা উদণ্ড যুৱকৰ ঘৰ দলগাঁৱৰ নদীৰকাষ গাঁৱত বুলি আৰক্ষীয়ে জানিবলৈ দিয়ে ৷ আৰক্ষী চকীৰ ভিতৰতে উদণ্ড যুৱকে কৰা আক্ৰমণ আৰু জে’ল হাজোতলৈ প্ৰেৰণ কৰিব লগা হোৱা এই ঘটনাই অঞ্চলটোত তীব্ৰ প্ৰতিক্ৰিয়াৰ সৃষ্টি কৰিছে ৷
লগতে পঢ়ক : নুনমাটি আৰক্ষীৰ জালত দালালৰূপী অধ্যাপক; 14 দিনৰ ন্যায়িক জিম্মালৈ প্ৰেৰণ - Land Broker Apprehended
