গুৱাহাটী, ১৪ মে’ : গুৱাহাটীত অনুষ্ঠিত হ’বলগীয়া বহুপ্ৰতিক্ষিত আই পি এল মেচলৈ মাজত মাত্ৰ কেইঘণ্টামান বাকী আছে ৷ আই পি এল মেচৰ সময়ত যাতে মহানগৰীত যানজঁটৰ সৃষ্টি নহয় তাৰ প্ৰতি লক্ষ্য ৰাখি মহানগৰ যান-বাহন আৰক্ষীয়ে আই পি এল মেচৰ বাবে দুদিন যান-বাহন চলাচলত কিছু নিষেধাজ্ঞা জাৰি কৰিছে ।
মঙলবাৰে মহানগৰ আৰক্ষীৰ যান-বাহন শাখাৰ ডি চি পি জয়ন্ত সাৰথি বৰাই এই সন্দৰ্ভত এক সংবাদমেল সম্বোধন কৰে ৷ তেখেতক সংগ দিয়ে অসম ক্ৰিকেট সন্থাৰ সম্পাদক ত্ৰিদিপ কোঁৱৰে ।
সংবাদমেল সম্বোধন কৰি জয়ন্ত সাৰথি বৰাই কয় যে 27 নং ৰাষ্ট্ৰীয় ঘাইপছত চাৰি চকাতকৈ ডাঙৰ বাণিজ্যিক বাহনৰ চলাচলত নিষেধাজ্ঞা জাৰি কৰা হৈছে ৷ কাইলৈ আৰু ১৯ মে’ত বিয়লি ৩ বজাৰ পৰা নিশা ১২ বজালৈ ৷ ডি এছ ৰোড, বি কে কাকতি ৰোড, এ কে আজাদ ৰোড, এ কে দেৱ ৰোড, কুল বসুমতাৰী ৰোড, এফ এ ৰোড, ঢপলিয়া ৰোড, বিষ্ণুপুৰ ৰোড, এম জি ৰোড, এ টি ৰোড , আৰ এম চি ৰোড, জি এন বি ৰোড আৰু কাহিলীপাৰা ৰোডত বন্ধ থাকিব বাণিজ্যিক বাহনৰ চলাচল ৷ তিনি চকীয়া বাণিজ্যিক বাহনৰো চলাচল বন্ধ থাকিব এইসমূহ পথত ৷
কাইলৈ আৰু ১৯ মে’ত আৰ্য নগৰৰ পৰা লখৰা চাৰিআলিলৈ ওৱান ৱে’ ৰোডৰহে ব্যৱস্থা থাকিব ৷ খেলৰ দিনা বৰ্ষাপাৰা তিনিআলিৰ পৰা ধীৰেনপাৰা তিনিআলিলৈ পথচোৱা ওৱান ৱে’ হ’ব ৷ অৱশ্যে জৰুৰীকালীন বাহন, স্কুল বাহন আৰু স্থানীয় বাসিন্দাৰ বাবে প্ৰযোজ্য নহয় এই নিষেধাজ্ঞা ৷
খেলৰ দৰ্শকসকলে ২ নং গেটেৰে সোমাবলৈ এ কে আজাদ পথেদি আহিব পাৰিব ৷ ৩ নং গেটৰ দৰ্শকসকল আৰ জি বৰুৱা পথেৰে সোমাব পাৰিব ৷ ৪ নং গেটৰ দৰ্শকসকল Rolling Mill Roadৰে সোমাব পাৰিব ৷
৫ নং গেটৰ দৰ্শকসকল ভূপেন হাজৰিকা পথেদি সোমাব পাৰিব ৷ আনহাতে ৬ নং গেটৰ দৰ্শকসকলো ভূপেন হাজৰিকা পথেদিয়েই সোমাব পাৰিব ৷ ৭ নং গেটৰ দৰ্শকসকল সোমাব পাৰিব বৰ্ষাপাৰা পথেদি ৷
