حیدرآباد: سال 2023 میں شاندار کارکردگی کی وجہ سے جعرات کو کرکٹ کی عالمی باڈی آئی سی سی نے بھارت کے تجربہ کار بلے باز ویراٹ کوہلی کو آئی سی سی مینز ون ڈے کرکٹر آف دی ایئر 2023 کا تاج پہنایا۔ کوہلی کو یہ اعزاز 50 اوور کے فارمیٹ میں ان کی غیر معمولی شراکت کے لیے بہترین خراج تحسین ہے۔
کوہلی نے ہم وطن کھلاڑیوں محمد شامی اور شبمن گل کے علاوہ نوزی لینڈ کے ڈیرل مچل کو پیچھے چھوڑتے ہوئے یہ اعزاز حاصل کیا ہے۔ وراٹ کوہلی چوتھی بار ونڈے کرکٹر آف دی ایئر بنے ہیں۔ اس سے قبل 2012، 2017 اور 2018 میں بھی انہیں یہ ایوارڈ دیا گیا تھا۔ آسٹریلوی کپتان پیٹ کمنز کو آئی سی سی مینز کرکٹر آف دی ایئر 2023 سے نوازا گیا ہے۔ کرکٹر آف دی ایئر آئی سی سی کا سب سے بڑا اعزاز ہے۔
قابل ذکر ہے کہ بھارت کی میزبانی میں ہونے والا آئی سی سی ون ڈے ورلڈ کپ 2023 میں کوہلی کا مظاہرہ شاندرا رہا تھا، جس کی وجہ سے انھیں ٹورنامنٹ کا بہترین کھلاڑی قرار دیا گیا۔ کوہلی نے نہ صرف بھارت کو فائنل تک پہنچایا بلکہ کرکٹ کی تاریخ میں اپنا نام سنہری لفظ میں بھی لکھوا دیا۔