Telangana Govt Fill Vacancies in Medical Department: నూతన సంవత్సరం వేళ రాష్ట్రంలో కొత్తగా నియమితులైన వైద్యులు విధుల్లో చేరారు. ఒకేసారి 929 మంది వైద్యులు విధుల్లో చేరారు. హైదరాబాద్‌ మాదాపూర్ శిల్పాకళా వేదికగా వీరికి వైద్యారోగ్యశాఖ మంత్రి హరీశ్‌రావు నియామక పత్రాలు అందజేశారు. సీఎం ప్రకటించిన 81 వేల ఉద్యోగాల్లో తొలుత పోస్టింగ్‌లు పొందింది వైద్యులేనని హరీశ్‌ వ్యాఖ్యానించారు.
వైద్యారోగ్యశాఖలో 21, 202 ఉద్యోగాలు భర్తీ చేశామని వివరించారు. బాగా పనిచేసి మంచి ఫలితాలు సాధించే వైద్యులకు బదిలీల్లో ప్రాధాన్యమిస్తామని హరీశ్‌రావు ప్రకటించారు. ఎమ్బీబీఎస్ కోర్సు అనంతరం ఒప్పంద ఉద్యోగులుగా పనిచేస్తూ కౌన్సెలింగ్ ద్వారా కొత్తగా వైద్యులుగా నియమితులైన వారు నిరుపేద‌ల‌కు వైద్యం అందిస్తామన్నారు. తక్షణమే పోస్టింగ్ ఇచ్చిన ప్రాంతాలకు వెళ్లి ఉద్యోగాల్లో చేరితే నూతన సంవ‌త్సరాన చేరిన జ్ఞాప‌కం మిగులుతుందని హరీశ్‌రావు సూచించారు.