Telangana Assembly Session 2023 :తెలంగాణ రాష్ట్ర ఆర్థిక పరిస్థితులపై శాసనసభలో శ్వేతపత్రం(White Paper) విడుదల చేసిన ఆర్థికశాఖ మంత్రి భట్టి విక్రమార్క స్వల్పకాలిక చర్చను ప్రారంభించారు. బీఆర్ఎస్ పదేళ్ల హయాంలో రాష్ట్ర ఆర్ధిక వ్యవస్థను ఛిద్రమైందని ఆరోపించారు. రోజూవారీ ఖర్చులకు ఓడీపై ఆధారపడాల్సిన దుస్థితికి దిగజార్చారని ధ్వజమెత్తారు. కొట్లాడి తెచ్చుకున్న తెలంగాణలో ప్రజల ఆకాంక్షలు నెరవేరలేదని పెదవివిరిచారు.
Deputy CM Bhatti Vikramarka in Assembly Session : రాష్ట్రాన్ని ప్రణాళికాబద్ధంగా ముందుకు తీసుకెళ్లడంపై చర్చిద్దామని మంత్రి భట్టి విక్కమార్క సూచించారు. అంకెల గారడీతో 9 ఏళ్లు ప్రజలను మోసం చేశారని విమర్శించారు. గత ప్రభుత్వం ఆర్థిక ప్రణాళిక (Financial planning) లేకుండా ఖర్చు చేసి రాష్ట్రానికి నష్టం చేశారని ఆరోపించారు. 1956 నుంచి 2014 వరకు తక్కువ ఖర్చుతోనే భారీ ప్రాజెక్టుల నిర్మాణం జరిగిందని గుర్తు చేశారు.
శ్వేతపత్రం విడుదలను తప్పుపట్టిన అక్బరుద్దీన్‌ - కౌంటర్ ఇచ్చిన మంత్రి శ్రీధర్‌ బాబు
Congress vs BRS in Assembly Session : కాంగ్రెస్‌ సర్కార్‌ రాష్ట్ర ఆర్థిక పరిస్థితిపై విడుదల చేసిన శ్వేతపత్రంపూర్తి తప్పులతడక, అంకెల గారడీగా బీఆర్ఎస్ విమర్శించింది. గ్యారంటీల నుంచి తప్పించుకునేందుకు సాకులు వెతుక్కుంటున్నారని మాజీ మంత్రి హరీశ్‌రావు(Harish Rao) ఆక్షేపించారు. రాష్ట్ర ఆర్థిక పరిస్థితి భేషుగ్గా ఉందని అనేక ప్రభుత్వ సంస్థలు చెప్పాయని హరీశ్‌రావు అన్నారు. దివాళా తీస్తుందనే దుష్ప్రచారం రాష్ట్ర ప్రతిష్టను దెబ్బతీస్తుందని ఆయన వ్యాఖ్యానించారు. పెట్టుబడులు తరలిపోతే పర్యవసానాలు దారుణంగా ఉంటాయన్న హరీశ్ రావు, కూర్చున్న కొమ్మను నరుక్కునే అవివేకమైన చర్యగా అభివర్ణించారు.
MLA Madan Mohan Rao Statements in Assembly : బీఆర్ఎస్ పాలనలో అన్ని వర్గాల ప్రజలు పేదరికంలో మగ్గిపోయారని కాంగ్రెస్‌ సభ్యులు, ఎల్లారెడ్డి ఎమ్మెల్యే మదన్‌మోహన్‌ రావు విమర్శించారు. గత పాలకులు వాస్తవాలను మరుగునపెట్టి ప్రజలను మభ్యపెట్టారని ధ్వజమెత్తారు.