రంజీ ట్రోఫీ 2022-23 సీజన్‌లో భాగంగా అరుణాచల్‌ ప్రదేశ్‌తో జరుగుతున్న మ్యాచ్‌లో మిజోరాం కెప్టెన్ తరువార్‌ కోహ్లీ ఆల్రౌండ్ ప్రదర్శనతో ప్రత్యర్థులకు చెమటలు పట్టించాడు. తొలుత బంతితో (4/2) ప్రత్యర్థి బ్యాటర్లను బెంబేలెత్తించిన అతడు.. ఆ తర్వాత బ్యాటింగ్‌లో ఏకంగా డబుల్ సెంచరీతో (297 బంతుల్లో 203; 30 ఫోర్లు, సిక్స్‌) అదరగొట్టాడు.
కాగా, ఈ మ్యాచ్‌లో టాస్‌ ఓడి తొలుత బ్యాటింగ్‌ చేసిన అరుణాచల్‌ ప్రదేశ్‌.. కోహ్లీ, రాల్టే (4/21), నవీన్‌ (1/22), అవినాశ్‌ యాదవ్‌ (1/17) ధాటికి 63 పరుగులకే కుప్పకూలింది. ఏపీ ఇన్నింగ్స్‌లో ఐదుగురు డకౌట్‌ కాగా.. కుమార్‌ న్యోంపు (24), కమ్షా (17), నబమ్‌ అబొ (10) మాత్రమే రెండంకెల స్కోర్‌ చేశారు. అనంతరం బ్యాటింగ్‌కు దిగిన మిజోరాం.. తరువార్‌ కోహ్లీ, గోస్వామి (50) రాణించడంతో తొలి ఇన్నింగ్స్‌లో 338 పరుగులకు ఆలౌటైంది. మిజోరాం ఇన్నింగ్స్‌లో కోహ్లీ, గోస్వామి, ఆండర్సన్‌ (28) మినహా అందరూ దారుణంగా విఫలమయ్యారు. అరుణాచల్‌ బౌలర్లలో నబమ్‌ అబొ 4, యబ్‌ నియా 3, అఖిలేశ్‌ సహాని 2, చేతన్‌ ఆనంద్‌ ఓ వికెట్‌ పడగొట్టారు.