Afghanistan Semi Final Chances :2023 వరల్డ్కప్ టోర్నీలోకి అంచనాలు లేకుండా అడుగుపెట్టింది అఫ్గానిస్థాన్. అంతా అనుకున్నట్లుగానే తొలి రెండు మ్యాచ్ల్లో వారి ప్రదర్శన కూడా అలాగే సాగింది. కానీ, ఆ తర్వాతే షురూ అయ్యింది అఫ్గాన్ అసలు కథ. ఈ మెగాటోర్నీలో మూడో మ్యాచ్లో డిఫెండింగ్ ఛాంపియన్ ఇంగ్లాండ్ను ఎదుర్కొన్న అఫ్గాన్.. సంచలన విజయం నమోదు చేసి యావత్ క్రికెట్ ప్రపంచం చూపు తమవైపు తిప్పుకుంది. ఈ మ్యాచ్లో ఆల్రౌండ్ ప్రదర్శన కనబరుస్తూ.. ఇంగ్లాండ్పై పూర్తి ఆధిపత్యం చెలాయించిన అఫ్గాన్.. 69 పరుగుల తేడాతో నెగ్గింది.
హ్యాట్రిక్ విజయాలు..ఇంగ్లాండ్తో మ్యాచ్ తర్వాత అఫ్గాన్.. న్యూజిలాండ్ చేతిలో ఓటమిపాలైంది. ఈ మ్యాచ్లో అఫ్గాన్, బ్యాటింగ్లో విఫలమైనప్పటికీ.. భీకరమైన ప్రత్యర్థిని 288 పరుగులకు కట్టడి చేసి బౌలింగ్లో ఫర్వాలేదనిపించింది. ఈ మ్యాచ్ తర్వాత ఆఫ్గానిస్థాన్ ఆడిన మూడింట్లోనూ విజయాలు నమోదు చేసి సెమీస్ ఆశలు సజీవంగా ఉంచుకుంది.
తాజా విజయంతో 8 పాయింట్లతో పట్టికలో ఐదో స్థానానికి ఎగబాకిన అఫ్గాన్.. మెరుగైన స్థితిలో కనిపిస్తోంది. మరోవైపు న్యూజిలాండ్ కూడా ఏడు మ్యాచ్ల్లో 4 గెలిచి 8 పాయింట్లు సంపాదించింది. కానీ, మెరుగైన రన్రేట్ కారణంగా అఫ్గాన్ కంటే న్యూజిలాండ్ ముందుంది. ఇక టోర్నీలో అఫ్గానిస్థాన్ మరో రెండు మ్యాచ్లు ఆడాల్సి ఉంది. ఈ రెండు మ్యాచ్ల్లో వారు బలమైన ఆస్ట్రేలియా, సౌతాఫ్రికాను ఎదుర్కొవాల్సి ఉంది. అయితే అఫ్గాన్ సెమీస్ చేరాలంటే రెండింట్లోనూ నెగ్గాలి. అటు న్యూజిలాండ్ కనీసం ఒక మ్యాచ్లో ఓడాలి. కానీ, ఒకవేళ అదృష్టం కలిసొచ్చి అఫ్గాన్ సెమీస్లో అడుగుపెడితే ప్రపంచకప్ చరిత్రలోనే అది సంచలనమౌతుంది.