କଟକ: ଦଶହରା ପାଇଁ ସଜେଇ ହୋଇଛି ସିଲଭର ସିଟି । ଦୀର୍ଘ ଦୁଇ ବର୍ଷ ପରେ କୋରୋନା କଟକଣା ମୁକ୍ତ ଦଶହରା ପୂଜା ଆରମ୍ଭ ହୋଇଛି । ସୁରୁଖୁରୁରେ ତଥା ଶାନ୍ତି ଶୃଙ୍ଖଳା ସହ ପୂଜା ସମ୍ପର୍ଣ୍ଣ ନେଇ କଟକ କମିଶନରେଟ ପୋଲିସ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ଏନେଇ କମିଶନରେଟ ପୋଲିସ ସୂଚନା ଦେଇଛି ।
ଏଥର ପୂଜା ପାଇଁ ସହରରେ ୫୫ ପ୍ଲାଟୁନ ପୋଲିସ ମୁତୟନ କରାଯିବ । ସୁରକ୍ଷା ଦାୟିତ୍ୱରେ ୬ ଜଣ ଅତିରିକ୍ତ ପୋଲିସ ଅଫିସର, ୪୦ ଜଣ ଡିଏସପି/ ଏସିପି ରହିବେ । ସେହିପରି ୫୫ ଜଣ ପୋଲିସ ଇନ୍ସପେକ୍ଟର, ୨୯୭ ଜଣ ସବ ଇନ୍ସପେକ୍ଟର ଓ ଆସିଷ୍ଟାଣ୍ଟ ସବ ଇନ୍ସପେକ୍ଟର, ୮୪ ଜଣ ହାବିଲଦାର, ୬୨୪ ଜଣ ଟ୍ରାଫିକ କନେଷ୍ଟବଳ, ୬୯୪ ଜଣ ହୋମହାର୍ଡ ଏବଂ ୭୦୬ ଜଣ ପୋଲିସ ଭଲ୍ୟୁଣ୍ଟିଅର ମୁତୟନ କରାଯିବ ବୋଲି ପୋଲିସ କମିଶନର ସୂଚନା ଦେଇଛନ୍ତି । ସେହିପରି ରାତି ୧୨ଟା ପର୍ଯ୍ୟନ୍ତ ସାଂସ୍କୃତିକ କାର୍ଯ୍ୟକ୍ରମ ପାଇଁ ଅନୁମତି ଦିଆଯାଇଛି । ସାଉଣ୍ଡ ବି ରାତି ୧୨ ଟା ପର୍ଯ୍ୟନ୍ତ ବଜାଇବା ପାଇଁ ଅନୁମତି ଦିଆଯାଇଥିବା କମିଶନର କହିଛନ୍ତି।
ଏହା ମଧ୍ୟ ପଢ଼ନ୍ତୁ:ଚାଲିଛି ମାଆଙ୍କ ଷଷ୍ଠୀ ପୂଜା, କାତ୍ୟାୟନୀ ରୂପରେ ଦର୍ଶନ ଦେଉଛନ୍ତି ଜଗତ ଜନନୀ
ଭସାଣିରେ ମଧ୍ୟ 12ଟା ପର୍ଯ୍ୟନ୍ତ ଡାକବାଜି ଯନ୍ତ୍ର ବାଜିବ । ଶାନ୍ତି ଶୃଙ୍ଖଳା ଦୃଷ୍ଟିରୁ ମେଢ଼ମାନଙ୍କୁ ସମ୍ବର୍ଦ୍ଧିତ କରିବ କମିଶନରେଟ ପୋଲିସ । ପ୍ରତ୍ୟେକ ପୂଜା ମଣ୍ଡପ ତରଫରୁ ନିଜ ନିଜ ଥାନା ସ୍ତରରେ ପୂଜା ନିମନ୍ତେ ଅନୁମତି ପାଇଁ ଆବେଦନ କରିପାରିବେ । ଚଳିତ ବର୍ଷ ଭସାଣିରେ ମେଢ଼ରେ GPS ଲାଗିବାର ବ୍ୟବସ୍ଥା ହୋଇଥିଲା । ମାତ୍ର ସମସ୍ତ ମେଢ଼ରେ ସମ୍ଭବତଃ ଲାଗି ପାରିନଥିବାରୁ ଆସନ୍ତା ବର୍ଷଠାରୁ ଏହି ବ୍ୟବସ୍ଥା କରିବାକୁ କମିଶନରେଟ ପୋଲିସ କହିଛନ୍ତି ।
ପୋଲିସ ଜନସାଧାରଣ ସହଭାଗୀତାରେ ସହରରେ 200ରୁ ଅଧିକ ସିସିଟିଭି ଲାଗିଥିବା ବେଳେ ପୂଜା ପୂର୍ବରୁ ଆହୁରି ଅଧିକ ସିସିଟିଭି ଲଗାଇବାକୁ ବ୍ୟବସ୍ଥା କରାଯାଉଥିବା କହିଛନ୍ତି କମିଶନରେଟ ପୋଲିସ । ବିଶୃଙ୍ଖଳାକୁ ଦୃଷ୍ଟିରେ ରଖି କଟକଣା କଡାକଡି କରାଯିବ । ନିଶା, ଡିଜେ ଓ ବାଣ ମୁକ୍ତ ଭସାଣ ଦିଗରେ ପୂଜା କମିଟିଗୁଡିକ ଯତ୍ନବାନ ହେବାରୁ ପରାମର୍ଶ ଦେଇଛନ୍ତି ପୋଲିସ କମିଶନର । ଚଳିତ ବର୍ଷ ପୂଜା ଶୃଙ୍ଖଳାରେ ସମାପ୍ତ କରିବା ନେଇ କଟକବାସୀଙ୍କୁ ଅନୁରୋଧ କରିଛନ୍ତି ପୋଲିସ କମିଶନର । ଭାଇଚାରା ଅକ୍ଷୂର୍ଣ୍ଣ ରଖିବା ସହିତ ପରମ୍ପରା ବଜାୟ ରଖିବାକୁ ଅନୁରୋଧ କରିଛି ଶାନ୍ତି କମିଟି ।
ଇଟିଭି ଭାରତ, କଟକ
