ವಾಷಿಂಗ್ಟನ್‌: ಉಕ್ರೇನ್‌ ಮೇಲೆ ಯುದ್ಧ ನಡೆಸುತ್ತಿರುವ ರಷ್ಯಾದ ಆಕ್ರಮಣ ನೀತಿಯನ್ನು ಅಮೆರಿಕ ತೀವ್ರವಾಗಿ ಖಂಡಿಸಿದ್ದು, ಯುದ್ಧ ಅಪರಾಧಗಳಿಗಾಗಿ ರಷ್ಯಾದ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಮತ್ತವರ ಆಡಳಿತದ ಬಗ್ಗೆ ತನಿಖೆಗೆ ಕೋರುವ ನಿರ್ಣಯವನ್ನು ಮಂಗಳವಾರ ರಾತ್ರಿ ಯುಎಸ್‌ ಸೆನೆಟ್ ಸರ್ವಾನುಮತದಿಂದ ಅಂಗೀಕರಿಸಿದೆ.
ಕಳೆದ 21 ದಿನಗಳಿಂದ ಪುಟ್ಟ ರಾಷ್ಟ್ರ ಉಕ್ರೇನ್‌ ಮೇಲೆ ಯುದ್ಧ ಮಾಡುತ್ತಿರುವ ಅಧ್ಯಕ್ಷ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರು ವಾರ್‌ ಕ್ರಿಮಿನಲ್ ಎಂದು ಅಮೆರಿಕದ ಸೆನೆಟ್‌ನಲ್ಲಿ ಸರ್ವಾನುಮತದಿಂದ ನಿರ್ಣಯ ಅಂಗೀಕರಿಸಲಾಗಿದೆ.
ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರ ನಿರ್ದೇಶದಲ್ಲಿ ರಷ್ಯಾ ಸೇನೆ ಉಕ್ರೇನ್‌ ಮೇಲೆ ಯುದ್ಧ ಮಾಡುತ್ತಿದೆ. ಹಿಂಸಾಚಾರ, ಯುದ್ಧದ ಅಪರಾಧಗಳು, ಮಾನವೀಯತೆಯ ವಿರುದ್ಧದ ಅಪರಾಧಗಳನ್ನು ಸೆನೆಟ್ ತೀವ್ರವಾಗಿ ಖಂಡಿಸುತ್ತದೆ ಎಂದು ಸೆನೆಟರ್‌ ಲಿಂಡ್ಸೆ ಗ್ರಹಾಂ ಹೇಳಿದ್ದಾರೆ. ಸಂಭಾವ್ಯ ಯುದ್ಧ ಅಪರಾಧಗಳಿಗಾಗಿ ಪುಟಿನ್, ಅವರ ಭದ್ರತಾ ಮಂಡಳಿ ಮತ್ತು ಸೇನಾ ನಾಯಕರನ್ನು ತನಿಖೆ ಮಾಡಲು ಈ ನಿರ್ಣಯ ಅಂತಾರಾಷ್ಟ್ರೀಯ ಕ್ರಿಮಿನಲ್ ನ್ಯಾಯಾಲಯಗಳನ್ನು ಪ್ರೋತ್ಸಾಹಿಸುತ್ತದೆ. ಈ ದೌರ್ಜನ್ಯಗಳು ಯುದ್ಧ ಅಪರಾಧಗಳಿಗಾಗಿ ತನಿಖೆಗೆ ಅರ್ಹವಾಗಿವೆ ಎಂದು ಮತ್ತೊಬ್ಬ ಸೆನೆಟರ್‌ ಚಕ್ ಶುಮರ್ ತಿಳಿಸಿದ್ದಾರೆ.
ಉಕ್ರೇನ್‌ ಮೇಲೆ ರಷ್ಯಾ ಯುದ್ಧದ ವಿರುದ್ಧ ಉಭಯಪಕ್ಷಗಳ ಪ್ರತಿನಿಧಿಗಳು ಬೆಂಬಲ ಮುಂದುವರಿಸುತ್ತಿರುವುದರಿಂದ ಈ ಕ್ರಮವನ್ನು ತ್ವರಿತವಾಗಿ ಮತ್ತು ಭಿನ್ನಾಭಿಪ್ರಾಯವಿಲ್ಲದೇ ಅನುಮೋದಿಸಲಾಗಿದೆ. ಸುಮಾರು ಎರಡು ವಾರಗಳ ಹಿಂದೆ ನಿರ್ಣಯವನ್ನು ಪರಿಚಯಿಸಲಾಗಿತ್ತು. ಸೆನೆಟ್ ನಿರ್ಣಯವು ಕಾನೂನಿನ ಬಲವನ್ನು ಹೊಂದಿರುವುದಿಲ್ಲ, ಆದರೆ, ಪುಟಿನ್ ಅವರ ಆಕ್ರಮಣಶೀಲತೆಯ ವಿರುದ್ಧ ಕಠಿಣ ನಿಲುವು ತೆಗೆದುಕೊಳ್ಳಲು ಕಾಂಗ್ರೆಸ್ ಬೈಡನ್‌ ಆಡಳಿತದ ರಾಜಕೀಯ ಬೆಂಬಲವನ್ನು ಒದಗಿಸುವ ಮತ್ತೊಂದು ಉದಾಹರಣೆಯಾಗಿದೆ.
ಇದನ್ನೂ ಓದಿ:ಉಕ್ರೇನ್‌ ಮೇಲೆ ಮತ್ತಷ್ಟು ದಾಳಿ: ಮರಿಯುಪೋಲ್‌ನಲ್ಲಿ ದೊಡ್ಡ ಆಸ್ಪತ್ರೆ ವಶಕ್ಕೆ ಪಡೆದ ರಷ್ಯಾ ಸೇನೆ