ডেংগু হৈছে এক ভাইৰাছজনিত ৰোগ যিয়ে প্ৰতি বছৰে বিশ্বৰ লাখ লাখ লোকক আক্ৰান্ত কৰে, বাৰিষা আৰু পৰিৱৰ্তিত বতৰত ইয়াৰ আশংকা বহুগুণে বৃদ্ধি পায় ৷ মাইকী Aedes Aegypti মহৰ কামোৰৰ ফলত ডেংগু জ্বৰ হয় ৷ ডেংগু জ্বৰৰ ক্ষেত্ৰত ৰক্তকণিকাবোৰ দ্ৰুতগতিত কমিবলৈ আৰম্ভ কৰে যাৰ ফলত শৰীৰ দুৰ্বল হৈ পৰে । এই ৰোগত উচ্চ জ্বৰ, মূৰ ঘূৰোৱা, তীব্ৰ মূৰৰ বিষ, হৃদস্পন্দন লেহেমীয়া হোৱা, চকুৰ পিছফালে তীব্ৰ বিষ, পেশী আৰু গাঁঠিৰ তীব্ৰ বিষ আদি সমস্যাৰ সৃষ্টি হ’ব পাৰে ৷ এই সমস্যাত তেজৰ প্লেটলেট কমি যায় যাৰ বাবে দুৰ্বলতাই দেখা দিয়ে ৷
শুভমন গিলো আক্ৰান্ত হৈছিল ডেংগুত
আইচিচি ক্ৰিকেট বিশ্বকাপ ২০২৩ৰ একেবাৰে আৰম্ভণিতে ডেংগুত ভুগিবলগীয়া হৈছিল টীম ইণ্ডিয়াৰ তাৰকা অ’পেনিং বেটছমেন শুভমন গিল ৷ ইয়াৰ বাবে তেওঁ কেংগাৰুৰ বিৰুদ্ধে ৮ অক্টোবৰ দেওবাৰে চেন্নাইৰ এম এ চিদাম্বৰম ষ্টেডিয়ামত অনুষ্ঠিত মেচত উপস্থিত থাকিব পৰা নাছিল ৷ সেয়ে এই ৰোগৰ পৰা কেনেকৈ হাত সাৰিব পাৰি জানি লও আহক-
ডেংগুৰ পৰা হাত সৰাৰ উপায়
১) মহৰ প্ৰজনন বন্ধ কৰক
ডেংগু মহে পৰিষ্কাৰ আৰু জমা হৈ থকা পানীত প্ৰজনন কৰে, যাৰ বাবে ইহঁতৰ সংখ্যা দ্ৰুতগতিত বৃদ্ধি পায় ৷ ইয়াক প্ৰতিৰোধৰ বাবে বহু ব্যৱস্থা গ্ৰহণ কৰিব পাৰি, যেনে স্থানীয় অঞ্চলৰ কোনো ঠাইতে পানী জমা হ’বলৈ নিদিব ৷ নলা-নৰ্দমাত জমা হৈ থকা পানীত ঔষধ ছটিয়াই দিব ৷ দৈনিক কুলাৰৰ পানী সলনি কৰি থাকিব আৰু তাত ২ চামুচ কেৰাচিন তেল দিব ৷ ছাদত থকা পানীৰ টেংকিবোৰৰ ঢাকনি বন্ধ কৰি ৰাখক ৷ নাৰিকলৰ বাকলি আৰু পুৰণি টায়াৰত বৰষুণৰ পানী জমা হ’বলৈ নিদিব ৷