গুৱাহাটী, ৫ আগষ্ট: মহানগৰীত দিনক দিনে বৃদ্ধি হৈছে অপৰাধৰ ঘটনা (Murder case in Guwahati) ৷ মহানগৰীৰ পাঞ্জাবাৰী কলাক্ষেত্ৰৰ সন্মুখৰ পৰা শুকুৰবাৰে উদ্ধাৰ হৈছে এজন যুৱকৰ মৃতদেহ (Dead body Found in Guwahati)৷ মৃতদেহটো উদ্ধাৰক কেন্দ্ৰ কৰি সমগ্ৰ অঞ্চলটোত সৃষ্টি হৈছে তীব্ৰ চাঞ্চল্যৰ ।
আজি পুৱাৰ ভাগত পাঞ্জাবাৰীৰ এটা নিৰ্মিয়মান বিল্ডিঙৰ পিছফালে উদ্ধাৰ হয় মৃতদেহটো । পুৱা স্থানীয় একাংশ লোকে মৃতদেহটো বিল্ডিঙটোৰ কাষত এটা স্থানত পৰি থকা প্ৰত্যক্ষ কৰি খবৰ দিয়ে আৰক্ষীক । পিছত ঘটনাস্থলীত দিছপুৰ আৰক্ষী উপস্থিত হৈ মৃতদেহটো উদ্ধাৰ কৰে ।
উল্লেখ্য যে, মৃতদেহটোৰ শৰীৰত সম্পূৰ্ণ বোকা লাগি আছিল । তাৰোপৰি শৰীৰৰ বিভিন্ন স্থানত আঘাতৰ চিন স্পষ্ট হৈ আছিল । অৱশ্যে বাতৰি লিখাৰ পৰলৈ মৃত লোকজনৰ পৰিচয় উদ্ধাৰ কৰিবলৈ সক্ষম হোৱা নাই আৰক্ষীয়ে ।