জোনাই, ১০ জানুৱাৰী :প্ৰাকৃতিক সম্পদ আৰু ভৌগলিক পৰিৱেশৰ বাবে উত্তৰ-পূৰ্বাঞ্চল পৃথিৱী বিখ্যাত । পাহাৰ, নদ-নদী আদিৰে আৱৰা উত্তৰ-পূৱলৈ সেয়ে প্ৰতিবছৰে লাখ লাখ পৰ্যটকৰ আগমন হয় (North East tourist hot spots) । পৃথিৱীৰ ভিন্ন প্ৰান্তৰ পৰ্যটকৰ আকৰ্ষণৰ কেন্দ্ৰবিন্দু উত্তৰ-পূৱৰ আটাইকেইখন ৰাজ্য । ইয়াৰ ভিতৰত অন্যতম হৈছে অৰুণাচল প্ৰদেশ । ৰাজ্যখনৰ প্ৰাকৃতিক পৰিৱেশে প্ৰতিবছৰে আকৰ্ষণ কৰে পৰ্যটকক ।
এইবাৰো দেশী-বিদেশী পৰ্যটকৰ আকৰ্ষণৰ কেন্দ্ৰবিন্দুত পৰিণত হৈছে অৰুণাচলৰ মায়’ডিয়া পাছ (Arunachal Mayodia Pass) ৷ বৰফৰ শুভ্ৰ আচ্ছাদনে আৱৰি ৰাখিছে অৰুণাচলৰ মায়'ডিয়া পাছক ৷ চাৰিওফালে কেৱল বৰফ আৰু বৰফ (Mayodia snow)। ৰাজ্যখনৰ বিভিন্ন ঠাইৰ মনোমোহা সৌন্দৰ্যই আপ্লুত কৰিছে পৰ্যটকক । যাৰ বাবে বিগত কেইটামান দিনত উত্তৰ-পূৱৰ ছুইজাৰলেণ্ড খ্যাত অৰুণাচললৈ যথেষ্ট পৰ্যটকৰ আগমন দেখিবলৈ পোৱা গৈছে ।
মায়'ডিয়াৰ সৌন্দৰ্য উপভোগ কৰিবলৈ বিপদসংকুল পথ অতিক্ৰম কৰি পৰ্যটকে ভিৰ কৰিছে । কণ কণ শিশুৰ পৰা আৰম্ভ কৰি পুৰুষ-মহিলা সকলোৱে বৰফৰ মাজত খেলিছে । মুঠতে আনন্দত মতলীয়া হৈ পৰিছে পৰ্যটকসকল । সচৰাচৰ ডিচেম্বৰ মাহৰ শেষৰ পৰা জানুৱাৰী মাহৰ শেষলৈকে মায়'ডিয়াক বৰফে ঢাকি ৰাখে । যান্ত্ৰিকতাৰ ব্যস্ততাৰ পৰা আতৰি সেয়ে এই সময়চোৱাৰ মায়'ডিয়াৰ বুকুত ভিৰ কৰে পৰ্যটকে (Natural beauty of Mayodia pass)।