বৰপেটা, ২৭ মে' :বৰপেটা চহৰৰ সমীপৰ সনকুছি প'ল্ট্ৰি কো-অপাৰেটিভ ছ'চাইটিৰ ভূমিত চলিছে বেদখল (Encroachment on Sankushi Co operative Society in Barpeta)। ১৯৮১ চনতে স্থাপন হোৱা এই কো-অপাৰেটিভ ছ'চাইটিৰ নামত আৱন্টিত ভূমিত বেদখল চলাৰ অভিযোগ উত্থাপন কৰিছে ছ'চাইটিৰ সদস্যসকলে ৷ কেৱল এয়াই নহয় ছ'চাইটিৰ ভূমিত মাদ্ৰাছা নিৰ্মাণো কৰিছে । যাৰ বাবে বৰপেটা সদৰ থানাত এই সন্দৰ্ভত এক গোচৰ ৰুজু কৰিছে ছ'চাইটিয়ে ৷ জানিব পৰা মতে বৰপেটা আৰক্ষীয়ে সমগ্ৰ ঘটনাক লৈ তদন্তও আৰম্ভ কৰিছে ৷
উল্লেখ্য যে একাংশ খিলঞ্জীয়া মুছলমান লোকে স্থাপন কৰিছিল এই ছ'চাইটি (Sankushi Co operative Society in Barpeta)। কিন্তু ছ'চাইটিখনৰ ২৮ বিঘা ভূমিত বিগত প্ৰায় ৫ বছৰ ধৰি একাংশ সন্দেহজনক লোকে ঘৰ-দুৱাৰ সাজি বেদখল কৰাৰ লগতে ছ'চাইটিখনৰ পুখুৰী আদিও দখল কৰি লৈছে ৷ অভিযোগ অনুসৰি ছ'চাইটিৰ সদস্যসকলে মাছ ধৰিবলৈ বা অইন কামত গ'লেই বেদখলকাৰীসকলে অস্ত্ৰ-শস্ত্ৰ লৈ তেওঁলোকক আক্ৰমণ কৰে ।