স্প’ৰ্টছ ডেস্ক, 28 নৱেম্বৰ:বৰ্ষাপাৰাত মেক্সৱেলৰ বিধ্বংসী বেটিঙেৰে ভাৰতক 5 উইকেটত পৰাস্ত কৰিলে অষ্ট্ৰেলিয়াই ৷ শৃংখলাৰ তৃতীয়খন টি-20 মেচত ভাৰতে নিৰ্ধাৰিত 20 অভাৰত 223 ৰাণৰ লক্ষ্য বান্ধি দিছিল অষ্ট্ৰেলিয়াক ৷ প্ৰত্যুত্তৰত 5 উইকেট হেৰুৱাই বিজয় সাব্যস্ত কৰে কেংগাৰু বাহিনীয়ে ৷ মেক্সেৱেলে সৰ্বাধিক 48 টা বলত 104 ৰাণ সংগ্ৰহ কৰে ৷
ভাৰতে বান্ধি দিয়া 223 ৰাণৰ লক্ষ্য আগত লৈ বেটিং কৰা অষ্ট্ৰেলিয়া দলটোৱে সুন্দৰ আৰম্ভনি কৰে যদিও 4.2 অভাৰৰ পৰা উইকেট পতন ঘটিবলৈ ধৰে নিয়মীয়া গতিত ট্ৰেভিছ হেড, হাৰ্ডি আৰু ইংলিছৰ উইকেট হেৰুওৱাৰ পাচত মেক্সৱেলে দলৰ স্ক’ৰ ব’ৰ্ড চম্ভালিবলৈ লয় ৷ কিন্তু 128 হৈ থকা অস্থাত ষ্টইনিছ আৰু 135 ৰাণত টিম ডেভিড আউট হয় ৷ অধিনায়ক ৱেডে মেক্সৱেলক সহযোগিতা আগবঢ়াই দলক বিজয় লক্ষ্যত উপনীত কৰে ৷ মেক্সৱেলৰ শতকীয় ইনিংছটোত আছিল 8 টা চাৰি আৰু 8 টা ছিক্সাৰ ৷
ভাৰতৰ হৈ ৰবি বিষ্ণৈয়ে 2 টা, অৰ্শদ্বীপ, আৱেশ আৰু অক্ষৰ পেটেলে 1 টাকৈ উইকেট দখল কৰে ৷ বৰ্তমান শৃংখলাত 2-1 ত আগবাঢ়ি আছে ভাৰত ৷ ইয়াৰ পূৰ্বে বিশাখাপট্টনম আৰু তিৰুৱনন্তপুৰমত হোৱা দুয়োখন খেলত ভাৰতে জয়লাভ কৰিছে ৷
ভাৰতৰ হৈ প্ৰথমে বেটিং কৰিবলৈ আহে যশস্বী জয়ছোৱাল আৰু ঋতুৰাজ গাইকোৱাড় ৷ প্ৰথম দুখন মেচত সুন্দৰ বেটিং কৰা যশস্বী তৃতীয়খন মেচত ৰাণ কৰাত বিফল হয় ৷ মাত্ৰ 6 ৰাণ কৰিয়েই পেভিলিয়ন মুখী হয় যশস্বী ৷ কোনো ৰাণ নকৰাকৈয়ে পেভিলিয়নলৈ উভতে উইকেট কীপাৰ বেটছমেন ঈশান কিষাণো ৷
ঋতুৰাজে অধিয়াক সূৰ্যকুমাৰৰ সৈতে লগ হৈ তৃতীয় উইকেটৰ যুটিত 57 ৰাণ সংগ্ৰহ কৰে ৷ কিন্তু 10.2 অভাৰত 39 ৰাণ কৰি আউট হয় সূৰ্য কুমাৰ ৷ কিন্তু বিস্ফোৰক বেটিঙেৰে অষ্ট্ৰেলিয়াৰ বলাৰক ধৰাশায়ী কৰে ঋতুৰাজে ৷ পঞ্চম স্থানত বেটিং কৰিবলৈ অহা তিলক বাৰ্মাও আক্ৰমণাত্মক হৈ পৰে অষ্ট্ৰেলিয়াৰ বিৰুদ্ধে ৷ দুয়ো ভাৰতৰ স্ক’ৰ 81 ৰ পৰা 222 লৈ আগুৱাই নিয়ে ৷ নিৰ্ধাৰিত 20 অভাৰত 3 উইকেটৰ বিনিময়ত ভাৰতে 222 ৰাণ কৰে আৰু অষ্ট্ৰেলিয়াক জয়ৰ বাবে 223 ৰাণৰ লক্ষ্য বান্ধি দিয়ে ৷