নিউজ ডেস্ক, ৪ জুলাই : ডিএমকে মন্ত্ৰী চেন্থিল বালাজীৰ মুক্তিৰ বাবে হেবিয়াছ কৰ্পাছ আবেদনৰ ওপৰত মাদ্ৰাজ উচ্চ ন্যায়ালয়ৰ খণ্ডিত ৰায়ৰ পিছত উচ্চতম ন্যায়ালয়ে মঙলবাৰে উচ্চ ন্যায়ালয়ৰ মুখ্য ন্যায়াধীশক গোচৰটো 'অতি সোনকালে' তৃতীয় ন্যায়াধীশৰ সন্মুখত উপস্থাপন কৰিবলৈ কয় । লগতে কয় যে নতুন ন্যায়াধীশে যিমান সম্ভৱ সোনকালে সিদ্ধান্ত ল'ব পাৰে । আনহাতে, শীৰ্ষ আদালতে বিষয়টো তৃতীয় ন্যায়াধীশৰ ওচৰলৈ পঠিওৱাৰ সলনি গোচৰটোৰ সিদ্ধান্ত ল'বলৈ প্ৰৱৰ্তন সঞ্চালকালয়ে অনুৰোধ জনাই কৰা আবেদন প্ৰত্যাখ্যান কৰে ।
প্ৰৱৰ্তন সঞ্চালকালয়ক প্ৰতিনিধিত্ব কৰা ছলিচিটৰ জেনেৰেল তুষাৰ মেহতাই ন্যায়াধীশ সূৰ্য কান্তৰ নেতৃত্বত আৰু ন্যায়াধীশ দীপংকৰ দত্তক লৈ গঠিত এখন বিচাৰপীঠৰ সন্মুখত গোচৰটোত প্ৰমাণ বিকৃতকৰণ সন্দৰ্ভত আশংকা ব্যক্ত কৰে আৰু কয় যে অভিযুক্তজন হৈছে এজন প্ৰভাৱশালী ব্যক্তি । আৰু যদি প্ৰমাণবোৰ বিকৃত কৰা হয় তেন্তে তাৰ ক্ষতি অপৰিৱৰ্তনীয় হ'ব । মেহতাই কয় যে ইয়াত আইনৰ কথা আছে, আন এখন বিচাৰপীঠ গঠন হোৱালৈকে অপেক্ষা কৰাৰ পৰিৱৰ্তে যিবোৰৰ ওপৰত এই আদালতে সিদ্ধান্ত ল'ব পাৰে । উল্লেখ্য, দিনটোৰ আৰম্ভণিতে উচ্চ ন্যায়ালয়ৰ এক খণ্ড বিচাৰপীঠে বিষয়টো সন্দৰ্ভত খণ্ডিত ৰায় প্ৰদান কৰে ।
আনহাতে, বালাজীক প্ৰতিনিধিত্ব কৰা জ্যেষ্ঠ অধিবক্তা কপিল চিব্বালে কয় যে উচ্চ ন্যায়ালয়ক এনেদৰে কেনেকৈ উপেক্ষা কৰিব পাৰি ? তেওঁ আঙুলিয়াই দিয়ে যে উচ্চতম ন্যায়ালয়ে কৈছিল যে উচ্চ ন্যায়ালয়ে প্ৰথমে বিবেচনা কৰা উচিত । আৰু এতিয়া এটা খণ্ডিত ৰায় আহিছে, সেয়েহে ই এখন ডাঙৰ বিচাৰপীঠলৈ যাব লাগে । ইফালে মেহতাৰ যুক্তিৰ বিৰোধিতা কৰি তেওঁ কয় যে এইটো এটা আইনৰ প্ৰশ্ন, ইয়াৰ ওপৰত শীৰ্ষ ন্যায়ালয়ে সিদ্ধান্ত ল'ব লাগিব । চিব্বালে কয়, "আপুনি কেনে পৰিস্থিতিত ইয়াক এই আদালতলৈ আনিব পাৰে ?"