নিউজ ডেস্ক, 19 ছেপ্তেম্বৰ: সাধাৰণতে শ্ৰোতাৰ গাৰ নোম শিঁয়ৰাই তুলিব পৰা গানে একো একোজন ব্যক্তিৰ মনত দেশপ্ৰেম জগাই তোলে ৷ ৰাম সিং ঠাকুৰী আছিল এনে এজন ব্যক্তি যিয়ে অস্ত্ৰৰে দেশৰ হৈ যুঁজাৰ সমান্তৰালকৈ সংগীতেৰে ভাৰতীয় সকলৰ মনলৈ জাতীয়তাবাদৰ প্ৰচাৰ কৰিছিল ৷
সমগ্ৰ দেশত অস্থিৰতা আৰু উত্তেজনাই বিৰাজ কৰাৰ সময়ত, ৰাম সিং ঠাকুৰীয়ে kadam kadam badhaye ja আৰু Subh Sukh Chain আদিৰে গীত ৰছনা কৰিছিল ৷ একে সময়তে ৰাষ্ট্ৰৰ প্ৰতি অতি নিষ্ঠাৰে ঠাকুৰীয়ে ভাৰতীয় সেনাতো সেৱা আগবঢ়াইছিল ৷ আৰু সেয়ে, সমগ্ৰ বিশ্বৰ আগত তেওঁৰ পৰিচয় কেৱল এজন স্বাধীনতা সংগ্ৰামীতে সীমাৱদ্ধ হৈ ৰোৱা নাই ৷ বৰঞ্চ এজন বহুমুখী প্ৰতিভাসম্পন্ন সংগীতজ্ঞ তথা সুৰকাৰ হিচাপেও তেওঁৰ এক নিজস্ব পৰিচয় আছে ৷
হিমাচল প্ৰদেশৰ ধৰমশালাৰ বাসিন্দা ঠাকুৰীয়ে 1914 চনৰ 15 আগষ্টত জন্মগ্ৰহণ কৰিছিল ৷ 14 বছৰ বয়সতে তেওঁ গোৰ্খা ৰাইফলছত যোগদান কৰিছিল ৷ 1941 চনৰ আগষ্টত দ্বিতীয় বিশ্বযুদ্ধৰ সময়ত তেওঁক মালয় আৰু ছিংগাপুৰলৈ যুদ্ধৰ বাবে প্ৰেৰণ কৰা হৈছিল ৷ তাতেই তেওঁক জাপানীসকলে যুদ্ধবন্দী কৰিছিল ৷ 1942 চনত মুক্তি লাভ কৰাৰ পাচতে তেওঁ সুভাষ চন্দ্ৰ বসুৰ সংস্পৰ্শলৈ আহে ৷ ঠাকুৰীৰ দক্ষতাৰ প্ৰশংসা স্বৰূপে তেতিয়াই সুভাষ বসুৱে তেওঁক এখন ভায়'লিন উপহাৰ দিছিল ৷