Sarpanch became a Sanitation Worker : చెత్తట్రాక్టర్​ డ్రైవర్​గా, పారిశుద్ధ్య కార్మికుడిగా మారిన గ్రామ సర్పంచ్​

Peddamunagala village sarpanch : గ్రామానికి ప్రథమ పౌరుడు సర్పంచ్​. గ్రామానికి ఏ సమస్యలు వచ్చినా పరిష్కరించడం తన బాధ్యత.. ఇతరులతో కలిసి పరిష్కరించడం వీలు కానీ సందర్భంలో.. కొన్నిసార్లు తనే స్వయంగా రంగంలోకి దిగాల్సి ఉంటుంది. ఈ పరిస్థితి పెద్దమునగాల గ్రామ సర్పంచ్​కు వచ్చింది.  ప్రభుత్వం తమ సమస్యలను పరిష్కరించాలంటూ ఖమ్మం జిల్లాలో పారిశుద్ధ్య కార్మికులు సమ్మెకు దిగారు. పంచాయతీ కార్మికులు విధులు బహిష్కరించడంతో గ్రామాల్లో ఎక్కడ చెత్త అక్కడే పేరుకుపోతోంది. పారిశుద్ధ్య పనులు నిలిచిపోయాయి. చెత్త ట్రాక్టర్లు రాక.. చెత్తను సేకరించకపోవడంతో ప్రజలు ఇబ్బందులు పడుతున్నారు. 

ఈ నేపథ్యంలో ఖమ్మం జిల్లా కొనిజర్ల మండలం పెద్ద మునగాలలో సర్పంచ్ పరికపల్లి శ్రీను.. స్వయంగా తానే చెత్త సేకరణ పనులు చేపట్టారు. పంచాయతీ ట్రాక్టర్​ను ఇంటింటికి తీసుకెళ్లి ఇళ్లలో చెత్త సేకరించి స్ఫూర్తిగా నిలిచారు. ట్రాక్టర్ డ్రైవర్​గా, పంచాయతీ కార్మికుడిగా అవతారం ఎత్తి గ్రామంలో పారిశుద్ధ్య పనులు చేపట్టారు. పంచాయతీ కార్మికుల సమస్యలు తక్షణమే పరిష్కరించాలని సర్పంచ్​ శ్రీను.. ప్రభుత్వాన్ని కోరారు. చాలీచాలని వేతనంతో ఏళ్లుగా కార్మికులు ఇబ్బందులు పడుతున్నారని.. వారి న్యాయపరమైన కోరికలు అమలు చేయాలని కోరారు. గ్రామ పంచాయతీల్లో పెండింగ్​లో ఉన్న బిల్లులును విడుదల చేయాలని డిమాండ్ చేశారు.