Nehru zoo park : హైదరాబాద్లోని నెహ్రూ జంతు ప్రదర్శనశాలలో రూ.1.33కోట్లతో నూతనంగా పక్షుల ఎవియరీని ఏర్పాటు చేసినట్లు అటవీశాఖ మంత్రి ఇంద్రకరణ్ రెడ్డి వెల్లడించారు. ఈ ఎన్‌క్లోజర్లలో ఆసియా, ఆస్ట్రేలియా, ఆఫ్రికా, దక్షిణ అమెరికా ఖండాల్లో కనిపించే అరుదైన పక్షిజాతికి చెందిన 680రకాల పక్షులు ఇందులో ఉంచామని మంత్రి తెలిపారు. జంతు ప్రదర్శనశాలకు వచ్చే సందర్శకుల కోసం ఎప్పటికప్పుడు నూతన సౌకర్యాలు కల్పిస్తున్నట్లు మంత్రి తెలిపారు.
సీసీ కెమెరాల ఏర్పాటు
minister indrakaran reddy: జంతు ప్రదర్శనశాలలో భద్రత వ్యవస్థను మెరుగుపరచడం, నిరంతర పర్యవేక్షణ, సందర్శకుల కదలికలు, జంతువుల ప్రవర్తనపై అధ్యయనం కోసం 200సీసీ కెమెరాలతో కమాండ్ కంట్రోల్ రూమ్‌ను ఏర్పాటు చేశామని మంత్రి స్పష్టం చేశారు. రెండో దశలో మరో 250 సీసీ కెమెరాలను ఏర్పాటు చేస్తామన్నారు. సెంట్రల్‌ జూ అథారిటీ, జపాట్ నిధులతో 1.6 కోట్లు వెచ్చించి సీసీ కెమెరాలను ఏర్పాటు చేశామన్నారు.
కొత్తగా వచ్చిన వైల్డ్ డాగ్స్
జంతు ప్రదర్శనశాలలోకి కొత్తగా ధోలేగా పిలువబడే 4 వైల్డ్ డాగ్స్‌ను తీసుకువచ్చినట్లు మంత్రి తెలిపారు. వీటిని జంతుమార్పిడి పద్ధతిలో కర్ణాటకలోని పిలికుల బయోలాజికల్ పార్కు, మంగళూరు నుంచి తీసుకు వచ్చామని వీటికోసం ప్రత్యేక ఎన్‌క్లోజర్లను ఏర్పాటు చేసినట్లు స్పష్టం చేశారు. కార్యక్రమంలో బహదూర్‌పుర ఎమ్మెల్యే మౌజమ్‌ ఖాన్‌, పీసీసీఎఫ్‌ ఆర్‌ శోభ, జూ పార్క్‌ క్యూరేటర్ రాజశేఖర్ తదితరులు పాల్గొన్నారు.
ఇదీ చూడండి: Minister Harish Rao: ప్రభుత్వాలు వ్యాపారాత్మక ధోరణితో పనిచేయకూడదు: హరీశ్‌
