ఒలింపిక్స్లో తన ప్రదర్శనతో భారత్కు బంగారు పతకాన్ని సాధించి.. జావెలిన్ అథ్లెట్ నీరజ్ చోప్డా అందరి దృష్టిని ఆకర్షించాడు. అయితే ఈ విజేత.. బంగారు పతకం సాధించే కన్నా ముందు కొద్ది క్షణాలు కంగారు పడిపోయాడట. అయితే ఆ కంగారు ఆటపై ఒత్తిడి వల్ల కాదు. అసలు ఆటకే ప్రధానమైన జావెలిన్ వల్ల. ఈ విషయాన్ని నీరజ్ చోప్డానే స్వయంగా వెల్లడించాడు.
"జావెలిన్ త్రో ఫైనల్ ప్రారంభం కావడానికి కొద్ది క్షణాలే ఉంది. ఆ సమయంలో నా జావెలిన్ కనపడలేదు. దానిని కోసం వెతుకుతూ కంగారు పడ్డాను. ఇంతలో పాకిస్థానీ ఆటగాడు ఆర్షాద్ నదీమ్ చేతిలో నా జావెలిన్ను ఉండటం చూశాను. వెంటనే పరిగెత్తుకు వెళ్లి ఆ జావెలిన్ నాది ఇచ్చేయమని అడిగాను. దానితోనే త్రో చేయాల్సి ఉందని చెప్పాను. అతను నా జావెలిన్ ఇచ్చేశాడు. ఈ గందరగోళం వల్లే నేను మొదటిసారి జావెలిన్ను కంగారుగా విసిరాను."
-నీరజ్ చోప్డా, జావెలిన్ అథ్లెట్
అతనిలో సత్తా ఉంది..
క్వాలిఫైయింగ్ సహా ఫైనల్ రౌండ్లో కూడా ఆర్షాద్ నదీమ్ మంచి ప్రదర్శన చేశాడని నీరజ్ చోప్డా పేర్కొన్నాడు. ఇది పాకిస్థాన్కు మంచి పరిణామం అని.. వాళ్లు జావెలిన్ మీద దృష్టి సారిస్తే భవిష్యత్తులో అంతర్జాతీయ స్థాయిలో మంచి పోటీ ఇస్తారని అభిప్రాయపడ్డాడు.
ఆ పరిస్థితి మారాలి..
ఒలింపిక్స్లో పతకం సాధించగానే క్రీడల గురించి చర్చించుకుని ఆ తర్వాత దాని గురించి మర్చిపోయే పరిస్థితి నుంచి బయటపడాలని నీరజ్ పేర్కొన్నాడు. క్రీడలపై ప్రభుత్వాలు నిరంతరం దృష్టి సారించాలని తెలిపాడు.
టోక్యో నుంచి తిరిగి వచ్చాక తరచూ ఎదో ఒక కార్యక్రమానికి నీరజ్ హాజరవుతున్నాడు. దీనిపై స్పందించిన చోప్డా.. విరామం లేకుండా తిరుగుతుండటం వల్ల తాను అలసటకు గురవుతున్నానని తెలిపాడు. ఈ క్రమంలోనే తనకు జ్వరం కూడా వచ్చిందని చెప్పాడు.
ఇదీ చదవండి : ధోనీ రూ.100 కోట్ల పరువు నష్టం దావా- విచారణ వాయిదా
