ప్రైవేట్ టీవీ ఛానల్తో పాటు ఐపీఎస్ అధికారి సంపత్ కుమార్పై.. టీమ్ఇండియా మాజీ కెప్టెన్ ఎంఎస్ ధోనీ దాఖలు చేసిన పరువు నష్టం దావా కేసును రెండు వారాలకు వాయిదా వేస్తూ న్యాయమూర్తి ఎన్.శేషాయ్ నిర్ణయం తీసుకున్నారు. కేసులో వాదప్రతివాదనలు విన్న న్యాయమూర్తి వ్యక్తిగత హక్కులకు భంగం వాటిల్లకుండా భావ ప్రకటన స్వేచ్ఛ ఉండాలని పేర్కొన్నాడు.
అసలేం జరిగింది..
ఐపీఎల్లో చెన్నై సూపర్ కింగ్స్ జట్టు రాజస్థాన్ రాయల్స్తో కలిసి ఫిక్సింగ్కు పాల్పడినట్లు ఓ ప్రైవేట్ టీవీ ఛానల్ ఆరోపించింది. మధ్యవర్తిగా ఉన్న కిట్టీ అనే వ్యక్తి ఇందులో ధోనీ పాత్ర ఉన్నట్లు ఒప్పుకున్నాడని సదరు ఛానల్ పేర్కొంది. ఇదే విషయాన్ని కేసు విచారణ చేసిన ఐపీఎస్ అధికారి సంపత్ కుమార్ కూడా ధ్రువీకరించారు.
దీనిపై స్పందించిన ధోనీ ఏకంగా కోర్టు మెట్లెక్కారు. తన పరువుకు భంగం వాటిల్లేలా టీవీ ఛానల్తో పాటు ఐపీఎస్ అధికారి ప్రవర్తించారని.. మద్రాస్ హైకోర్టులో పరువు నష్టం దావాను దాఖలు చేశాడు. ఈ కేసు 2014కి సంబంధించింది.
ఈ కేసులో సీబీసీఐడీ తన దర్యాప్తు కొనసాగిస్తుంది. ధోనీని ఈ కేసు నుంచి కాపాడటానికి కిట్టీ నిజం ఒప్పుకోవట్లేదని సదరు టీవీ ఛానల్ చెప్పుకొచ్చింది. మహి క్రికెట్ కంటే గొప్పవాడు కాదని పేర్కొంది. ఆటలో ఫిక్సింగ్ అనేది సాధారణమైపోయిందని ఇటీవల సుప్రీం చేసిన వ్యాఖ్యలను గుర్తు చేసింది. ధోనీతో తమకు వ్యక్తిగత ద్వేషం లేదని స్పష్టం చేసింది. ఐపీఎల్ ఫిక్సింగ్ను బయటపెట్టడానికే మేము ఈ అంశాన్ని తీసుకున్నామని టీవీ ఛానల్ పేర్కొంది. మీడియా గొంతు నొక్కడానికి ధోనీ ప్రయత్నిస్తున్నట్లయితే అతడి కేసును జరిమానాతో కొట్టివేయాలని అభిప్రాయపడింది.
ఇదీ చదవండి: ms dhoni: సిక్సులు బాదాడు.. బంతి కోసం వెతికాడు!
