Rohit Sharma Cricket Academy : టీమ్ఇండియా కెప్టెన్ రోహిత్ శర్మ క్రికెట్లోనే కాదు బిజినెస్లోనూ రాణిస్తున్నాడు. ఇటీవలే వెస్టిండీస్ పర్యటన ముగించుకున్న రోహిత్ తాజాగా ఓ క్రికెట్ అకాడమీ ఓపెన్ చేసేందుకు అమెరికా పయనమయ్యాడు. దేశంలో అత్యంత పేరుగాంచిన 'క్రిక్ కింగ్డమ్' అనే క్రికెట్ అకాడమీలో అతడికి భాగస్వామం ఉంది. ఈ క్రమంలో తన అకాడమీని విస్తరించాలని భావించిన హిట్మ్యాన్.. శనివారం అమెరికాలో కూడా 'క్రిక్ కింగ్డమ్'ను తన భాగస్వాములతో కలిసి లాంఛ్ చేశాడు. ఈ విషయాన్ని రోహిత్ స్వయంగా తన ఇన్స్టాగ్రామ్లో షేర్ చేశాడు.
Crickingdom Branches : ప్రపంచవ్యాప్తంగా క్రికెట్కు క్రేజ్ పెరుగుతోంది. ఇటీవలె అమెరికాలో జరిగిన 'మేజర్ లీగ్ క్రికెట్' (ఎంఎల్సీ) ఇందుకు తాజా నిదర్శనం. ఈ ఎమ్ఎల్సీ సూపర్ సక్సెస్ అవ్వడం వల్ల అమెరికాలో కూడా క్రికెట్ అకాడమీలు పుట్టుకొస్తున్నాయి. దీంతో రోహిత్ కూడా తన క్రికెట్ అకాడమీని యూఎస్ఏలో ప్రారంభించాడు. కాగా ఇప్పటికే 'క్రిక్ కింగ్డమ్' అకాడమీ భారత్ సహా, సింగపూర్, జపాన్లో ఉండగా.. తాజాగా అమెరికాలో ప్రారంభించారు. ఇక త్వరలో బంగ్లాదేశ్లోనూ ఈ అకాడమీని ప్రారంభించనున్నట్లు 'క్రిక్ కింగ్డమ్' కో ఓనర్ సూర్యవంశీ చేతన్ వెల్లడించారు.
Rohit Sharma Endorsement : కాగా రోహిత్ ఇప్పటికే అడిడాస్, మ్యాగీ, ఒప్పో, నిస్సాన్, గ్లెన్మార్క్, అరిస్టోకార్ట్, ఐఐఎఫ్ఎల్ ఫైనాన్స్, హైలాండర్ గార్మెంట్స్, రెలీ స్ర్పే, సియేట్, డ్రీమ్ 11, జియో, హుబ్లాట్ వాచెస్, ఓక్లే వంటి పలు బ్రాండ్లతో ఎండార్స్మెంట్స్ కలిగి ఉన్నాడు.
Rohit Sharma Bcci Contract : ఇక రోహిత్ బీసీసీఐ ఏ+ కాంట్రక్ట్ గ్రేడ్లో కొనసాగుతున్నాడు. అయితే ప్రస్తుత టీమ్ఇండియా జట్టులోని ముగ్గురు ప్లేయర్లు (రోహిత్ శర్మ, విరాట్ కోహ్లీ, జస్ప్రీత్ బుమ్రా) మాత్రమే ఏ+ గ్రేడ్లో కొనసాగుతున్నారు. ఈ గ్రేడ్ ప్లేయర్లకు బీసీసీఐ ఏటా రూ. 7 కోట్లు చెల్లిస్తోంది. అటు ఐపీఎల్లో ముంబయి ఇండియన్స్ ఫ్రాంచైజీ గత రెండు సీజన్ల నుంచి రోహిత్కు రూ. 16 కోట్లు చెల్లిస్తోంది.
