Richa Ghosh Birthday : చైనా హాంగ్జౌలో జరుగుతున్న 19వ ఆసియా క్రీడల్లో భాగంగా భారత మహిళా క్రికెట్ జట్టు... లంకేయులపై తుది పోరులో 19 పరుగుల తేడాతో విజయ సాధించి చరిత్ర సృష్టించింది. క్రికెట్ పోటీల్లో స్వర్ణ పతకం గెలిచిన తొలి జట్టుగా నిలిచింది. దీంతో టీమ్ఇండియా అమ్మాయిల జట్టుపై సర్వత్రా ప్రశంసలు కురుస్తున్నాయి.
చాలా ఏళ్ల తర్వాత!.. అయితే ఈ విజయం సాధించిన ఫైనల్ జట్టులో సభ్యురాలైన టీమ్ఇండియా ప్లేయర్ రిచా ఘోష్ సెప్టెంబర్ 28న(గురువారం) తన 20వ ఏటలోకి అడుగుపెట్టబోతుంది. ఈమె బంగాల్.. డార్జిలింగ్ జిల్లాలోని సిలిగురి పట్టణానికి చెందిన అమ్మాయి. అయితే ఈమె దాదాపు 7, 8 సంవత్సరాల తర్వాత తన కుటుంబ సభ్యులు, మిత్రులతో కలిసి జన్మదిన వేడుకలను జరుపుకోబోతుండటం విశేషం. ఇందుకు సంబంధించి రిచా కుటుంబ సభ్యులు పుట్టినరోజు వేడుకలను ఘనంగా ఏర్పాట్లు చేస్తున్నారు. ఈ వేడుకల్లో మరో బంగాల్ క్రికెటర్ టిటాస్ సాధు కూడా సందడి చేయనుంది.
ఎంతో గర్వాంగా ఉంది.. దేశానికి బంగారు పతకాన్ని సాధించిన జట్టులో తమ అమ్మాయి ఉండటం తమకు ఎంతో గర్వంగా ఉందని రిచా ఘోష్ తండ్రి ఆనందం వ్యక్తం చేశారు. సెప్టెంబర్ 27న బుధవారం రిచా సిలిగురికి చేరుకుంటుందని ఆయన తెలిపారు. రిచా.. గత 7-8 సంవత్సరాల నుంచి తన పుట్టినరోజు నాడు ఏదో ఓ టోర్నమెంట్ల కోసం వివిధ ప్రాంతాల్లో ఉంటోందని చెప్పారు. ఇన్నాళ్ల తర్వాత ఆమె తమతో కలిసి బర్త్డే సెలబ్రేట్ చేసుకోవడం చాలా ఆనందంగా ఉందని పేర్కొన్నారు. ఎప్పటికీ గుర్తిండిపోయేలా ఈ వేడుకను నిర్వహించి ఆమెకు సర్ప్రైజ్ ఇవ్వనున్నట్లు చెప్పారు. రిచాకు ఎంతో ఇష్టమైన పలు రకాల వంటకాలను.. ఆమె తల్లి వండి తినిపించబోతున్నట్లు చెప్పారు.
"ఆదివారం రాత్రి రిచాతో నేను ఫోన్లో మాట్లాడాను. కానీ క్రికెట్ గురించి ఏమి మాట్లాడుకోలేదు. ఇతర విషయాల గురించి మాట్లాడుకున్నాము. చివరగా సోమవారం జరగబోయే మ్యాచ్కు తనకు విషెస్ చెప్పాను. ఇతర టోర్నమెంట్లలో నెగ్గిన విజయాల కన్నా ఈ ఆసియా క్రీడల్లో విజయం అనేది రిచాకు ఓ బిగ్ అచీవ్మెంట్. అసియా క్రీడల్లో గెలవాలన్నది ప్రతిఒక్కరి కల. దానిని నా కూతురు నెరవేర్చుకుంది. అందుకు గర్వంగా ఫీల్ అవుతున్నాను. ఇతర ప్లేయర్లు కూడా అద్భుతంగా ఆడారు. ఇక సెప్టెంబర్ 27న తను సిలిగురికి చేరుకుంటుంది."
- మన్బేంద్రా ఘోష్, రిచా ఘోష్ తండ్రి
