ఐపీఎల్.. భారత్లోనే కాదు ప్రపంచవ్యాప్తంగా కోట్లాది మంది ఆదరణ పొందింది. ఈ క్రికెట్ పండుగ ఎప్పుడు ప్రారంభమైందో తెలుసా? సరిగ్గా 14 ఏళ్ల క్రితం ఇదే రోజున తొలి మ్యాచ్ జరిగింది. అప్పటి నుంచి క్రికెట్ అభిమానులను అలరిస్తూనే ఉంది. ఐపీఎల్కు ఎందుకు ఇంత క్రేజ్ లభించింది? ఓసారి లుక్కేద్దాం.
2008, ఏప్రిల్ 18న..
2008 ఏప్రిల్ 18న మొదటి ఐపీఎల్ మ్యాచ్ జరిగింది. బెంగళూరులోని చిన్నస్వామి స్టేడియంలో.. రాయల్ ఛాలెంజర్స్ బెంగళూరు, కోల్కతా నైట్ రైడర్స్ తలపడ్డాయి. అయితే.. ఆరంభంలో జరిగిన మ్యాచ్లోనే ఐపీఎల్ అంటే అభిమానుల్లో కొత్త ఉత్సాహం వచ్చేలా ఆడింది కోల్కతా జట్టు.
మెకల్లమ్ మెరుపు ఇన్నింగ్స్..
టాస్ గెలిచి బౌలింగ్ ఎంచుకున్న ఆర్సీబీ జట్టుకు ఆదిలోనే చుక్కలు చూపించాడు న్యూజిలాండ్ మాజీ ఆటగాడు బ్రెండన్ మెకల్లమ్. 16వ ఓవర్లో 100 పరుగులు పూర్తి చేసిన మెకల్లమ్ చివరి వరకూ క్రీజ్లో నిలిచాడు. చివరి 4 ఓవర్లలో 56 రన్స్తో మొత్తంగా 158 పరుగులు చేశాడు. దీంతో కోల్కతా మూడు వికెట్ల నష్టానికి పరిమిత 20 ఓవర్లలో 222 పరుగులు లక్ష్యాన్ని ఆర్సీబీ ముందుంచింది.
ఛేదనలో బెంగళూరు జట్టుకు ఘోర పరాభవం ఎదురైంది. 82 పరుగులకే ఆర్సీబీని కుప్పకూల్చింది కోల్కతా. ఈ దెబ్బతో ఘనమైన మొదటి విజయాన్ని తమ ఖాతాలో వేసుకుంది కోల్కతా. కానీ, అనూహ్యంగా కోల్కతా జట్టు సెమీఫైనల్కు కూడా చేరుకోలేదు.
రాజస్థాన్ ఖాతాలో తొలి ట్రోఫీ..
మొదటి ఐపీఎల్ కప్పు గెలిచిన ఘనతను రాజస్థాన్ రాయల్స్ తమ ఖాతాలో వేసుకుంది. ఇప్పటివరకు జరిగిన 13 ఐపీఎల్ సీజన్లలో ముంబయి జట్టు అత్యధికంగా ఐదు సార్లు ట్రఫీ గెలవగా.. చెన్నై జట్టు మూడు సార్లు కప్ను సొంతం చేసుకుంది. కోల్కతా రెండు సార్లు కప్ గెలిచింది.
ప్రస్తుతం 14వ ఎడిషన్ ఐపీఎల్ సీజన్ జరుగుతోంది.
ఇదీ చదవండి:ఆయనకు జీవితాంతం రుణపడి ఉంటా: ఆనంద్
