ICC Test Rankings 2023 : టీమ్ఇండియా యంగ్ స్టార్ యశస్వి జైస్వాల్ ఇటీవల జరిగిన వెస్టిండీస్ టూర్లో తనదైన ప్రతిభను కనబరిచి అందరిని ఆకట్టుకున్నాడు. ఐపీఎల్ నుంచే తన జోరును ప్రదర్శించిన జైస్వాల్.. ఆడిన ప్రతి మ్యాచ్లోనూ అదరగొడుతున్నాడు. ఇక తాజాగా వచ్చిన ఐసీసీ టెస్ట్ ర్యాంకింగ్స్లోనూ సత్తా చాటాడు. సుమారు 11 పాయింట్లు ఎకబాకి 63వ స్థానాన్ని కైవసం చేసుకున్నాడు. కెప్టెన్ రోహిత్ శర్మ కూడా తన స్థానాన్ని మెరుగుపరచుకుని 9వ స్థానంలో ఉన్నాడు. శ్రీలంక ఆటగాడు దిముత్ కరుణరత్నేతో కలిసి హిట్‌మ్యాన్ 9వ స్థానంలో ఉన్నాడు. ప్రస్తుతం జైస్వాల్ వద్ద 466 పాయింట్స్ ఉండగా.. రోహిత్ వద్ద 759 పాయింట్లు ఉన్నాయి.
మరోవైపు రోహిత్ సహచరులు రిషబ్ పంత్, రవీంద్ర జడేజా స్థానాల్లో మార్పులు వచ్చాయి. 743 పాయింట్లతో 12వ స్థానానికి రిషబ్ పంత్ స్థిరపడగా.. ఒక స్థానం ఎగబాకి జడేజా 39వ ర్యాంకుకు చేరుకున్నాడు. అయితే విరాట్ కోహ్లీ స్థానంలో ఎలాంటి మార్పులు రాలేదు. 22 పాయింట్లు పెంచుకుని 733 వద్ద విరాట్ కోహ్లీ తన 14వ స్థానాన్ని సుస్థిరం చేసుకున్నాడు. ఇక టాప్-10 ర్యాంకుల్లో ఎలాంటి మార్పులు జరగలేదు. ఇప్పటికీ నెంబర్‌ 1గా కేన్‌ విలియమ్సన్‌ కొనసాగుతున్నాడు. ఇక లబుషేన్‌, జో రూట్‌, ట్రవిస్‌ హెడ్‌, బాబర్‌ ఆజం వరుసగా ఆ తర్వాతి స్థానాలను సొంతం చేసుకున్నారు.
బౌలింగ్లో వాళ్లదే హవా..
ఐసీసీ టెస్టు బౌలింగ్ ర్యాంకింగ్స్లో టీమ్ఇండియా వెటరన్‌ స్పిన్నర్‌ రవిచంద్రన్‌ అశ్విన్ టాప్లో ఉన్నాడు. ఇక మరో స్పిన్నర్‌ రవీంద్ర జడేజా ఒక స్థానం మెరుగుపరచుకుని ఆరో ర్యాంకు సాధించాడు. ప్రస్తుతం జడేజా వద్ద 782 పాయింట్స్ ఉండగా.. అశ్విన్ 879 పాయింట్స్తో కొనసాగుతున్నాడు. ఇక మరో బౌలర్ అక్షర్ పటేల్ ఈ లిస్ట్లో ఐదవ స్థానంలో ఉన్నాడు. విండీస్‌తో రెండో టెస్టులో 5 వికెట్లతో అదరగొట్టిన మహ్మద్ సిరాజ్ ఐదు స్థానాలు ఎగబాకి 33వ స్థానానికి చేరుకున్నాడు. ఇక ఆల్‌రౌండర్ ర్యాంకింగ్స్లో ఎలాంటి మార్పులు చోటు చేసుకోలేదు. జడేజా మొదటి స్థానంలో, అశ్విన్ రెండో స్థానంలో కొనసాగుతున్నాడు.
