ఆస్ట్రేలియాతో పింక్‌బాల్‌ టెస్టు ఆడేందుకు, టీమ్ఇండియా పేసర్లు ఆసక్తిగా ఎదురు చూస్తున్నారని ఛెతేశ్వర్ పుజారా అన్నాడు. ఇటీవలే ఓ టీవీ ఛానెల్ కార్యక్రమంలో మాట్లాడుతూ ఈ విషయాన్ని పంచుకున్నాడు. కంగారూ గడ్డపై రానున్న డిసెంబర్‌ 3 నుంచి ఇరుజట్ల మధ్య నాలుగు టెస్టుల సిరీస్‌ జరగనుంది. ఆడిలైడ్‌లో నిర్వహించే రెండో టెస్టును గులాబి బంతితో(డే/నైట్‌ టెస్టు) జరపాలని ప్రణాళిక రూపొందించారు. ఈ నేపథ్యంలోనే పుజారా పై వ్యాఖ్యలు చేశాడు.
"బుమ్రా, షమి, ఇషాంత్‌కు ఇప్పటికే పింక్‌బాల్‌ టెస్టు ఆడిన అనుభవముంది. ఈ ముగ్గురూ ఆస్ట్రేలియాతో ఆ టెస్టు కోసం ఆసక్తిగా ఎదురుచూస్తున్నారు. గతేడాది ఈడెన్‌గార్డెన్స్‌లో బంగ్లాతో జరిగిన తొలి గులాబి బంతి మ్యాచ్‌ను వాళ్లెంతో ఆస్వాదించి ఉండొచ్చు. అలాగే ఆస్ట్రేలియా పిచ్‌లపై అలాంటి బంతితో బౌలింగ్‌ చేయడం వారికి గొప్ప అనుభూతిని మిగులుస్తుందనుకుంటున్నాను"
-ఛెతేశ్వర్ పుజారా, టీమ్ఇండియా టెస్టు క్రికెటర్
మరోవైపు గులాబి బంతితో ఆడటం బ్యాట్స్మెన్కు పెద్ద సవాలని, అది సంప్రదాయక ఎర్రబంతితో పోలిస్తే చాలా కష్టమని పుజారా పేర్కొన్నాడు. ఆడే ఫార్మాట్‌ అదే అయినా పింక్ బంతి కనిపించడం, పేస్‌ వేరుగా ఉంటాయని చెప్పాడు. ఓ బ్యాట్స్‌మన్‌గా ఆ బంతికి అలవాటుపడాల్సిన అవసరం ఉందని అన్నాడు. మరీ ముఖ్యంగా ఎర్రబంతికి అలవాటుపడ్డ యువ క్రికెటర్లకు, గులాబి బంతితో ఆడటం సవాలుగా మారుతుందని అభిప్రాయపడ్డాడు.
పింక్బాల్తో ఆడటం సులభం కాదని, ప్రత్యేకంగా నెట్‌ సెషన్స్‌ నిర్వహించాలని పుజారా సూచించాడు. అయితే దేశవాళీ క్రికెట్‌లో అలా చేయడం కష్టతరమని వివరించాడు. ఏ యువ క్రికెటర్కు అయినా రంజీల్లో ఎర్ర బంతితోనే ఆడిన అనుభవం ఉంటుందని, తద్వారా వారు జాతీయ జట్టులోకి వచ్చాక దానితో ఆడటం సులభమవుతుందని పేర్కొన్నాడు.
గత ఆసీస్‌ పర్యటనలో పుజారా బ్యాటింగ్‌తో అదరగొట్టడం వల్ల.. 71 ఏళ్ల తర్వాత ఆ దేశంలో చారిత్రక టెస్టు సిరీస్‌ 2-1 తేడాతో గెలుచుకుంది భారత్. ఈ నేపథ్యంలోనే రాబోయే సిరీస్‌లో ఇరుజట్ల మధ్య తొలి డే/నైట్‌ మ్యాచ్ జరగనుండటం వల్ల ఆసక్తి కాస్త ఇంకా పెరుగుతోంది.
ఇదీ చూడండి... నా జీవితంలో ఆనందం నువ్వు: హార్దిక్
