మెటా కంపెనీకి చెందిన ప్రముఖ మెసేజింగ్ అండ్ కాలింగ్ యాప్ వాట్సాప్లో అదిరిపోయే ఫీచర్ రానుంది. స్టేటస్ అప్లోడ్ చేస్తే.. ఒకేసారి వాట్సాప్తో పాటు ఫేస్బుక్లోనూ పోస్ట్ అయ్యే విధంగా కొత్త ఫీచర్ను తీసుకువచ్చేందుకు మెటా ప్రయత్నాలు చేస్తోంది. ప్రస్తుతం ఈ ఫీచర్పై సంస్థ ప్రయోగాలు నిర్వహిస్తోంది. మరికొద్ది రోజుల్లో దీనిని యూజర్లకు అందుబాటులో తెచ్చేందుకు సన్నాహాలు చేస్తోంది.
"ప్రస్తుతం వాట్సాప్లోగానీ, ఫేస్బుక్లోగానీ ఏదైన స్టేటస్ అప్లోడ్ చేయాలంటే వేరు వేరుగా చేయాల్సి ఉంటుంది. ఇలా ఒకే స్టేటస్ను రెండుసార్లు పోస్ట్ చేయాలంటే వినియోగదారులకు చిరాకుగా ఉంటుంది. అందుకే ఈ కొత్త ఫీచర్ను తీసుకురావాలని ప్రయత్నిస్తున్నాం. వాట్సాప్ స్టేటస్ అప్డేట్ను సులభతరం చేయాలన్నదే మా లక్ష్యం" అని సంస్థ ప్రతినిధులు తెలిపారు. దీని ప్రకారం ఏదైన స్టేటస్.. వాట్సాప్లో అప్లోడ్ చేస్తే అది ఆటోమెటిక్గా ఫేస్బుక్లోనూ షేర్ అయిపోతుంది.
ఈ కొత్త ఫీచర్ ఆప్షన్ సదుపాయాన్ని పొందాలంటే.. ప్రైవసీ సెట్టింగ్లోకి వెళ్లి, వినియోగదారుల ఫేస్బుక్ ఖాతాను జత చేసుకుంటే సరిపోతుంది. దీంతో ఒకేసారి వాట్సాప్లోనూ, ఫేస్బుక్లోనూ.. స్టేటస్ అప్లోడ్ అవుతుంది. కొత్త ఫీచర్తో వినియోగదారుల సమయం వృథా కాదని, ఒకే స్టేటస్ను రెండుసార్లు అప్డేట్ చేయాల్సిన అవసరం ఉండదని సంస్థ ప్రతినిధులు చెబుతున్నారు.
వాట్సాప్ ఇంటర్ఫేస్లో మార్పులు..
స్టేటస్తో పాటు వాట్సాప్ ఇంటర్ఫేస్లో కీలక మార్పులు చేసేందుకు సంస్థ సిద్ధమైంది. వాట్సాప్ నావిగేషన్ బార్లో ఈ మార్పులు జరగనున్నాయి. ప్రస్తుతం వాట్సాస్ యాప్లో పైన కనిపించే నావిగేషన్ బార్లు కిందకి రానున్నాయి. ఈ అప్డేట్ ఇంకా టెస్టింగ్ స్టేజ్లోనే ఉంది. ఈ కొత్త అప్డేట్ బీటా టెస్టర్లకు కూడా ఇంకా అందుబాటులోకి రాలేదు. పూర్తిగా డెవలప్ చేసిన తర్వాత దీన్ని తొలుత బీటా టెస్టర్లకు, ఆ తర్వాత సాధారణ యూజర్లకు అందుబాటులోకి తేనుంది వాట్సాప్.
"కొంత కాలంగా వాట్సాప్ ఇంటర్ఫేస్ను రీడిజైన్ చేయమని వినియోగదారులు కోరుతున్నారు. ప్రస్తుతం ఉన్న ఇంటర్ఫేస్.. అవుట్డేట్గా వారు భావిస్తున్నారు. మారిన ఆండ్రాయిడ్ అప్డేట్లకు అనుగుణంగా.. వాట్సాప్ ఇంటర్పేస్ లేదని చెబుతున్నారు. ఐఓఎస్ యాప్‌లానే చాట్‌లు, కాల్‌లు, కమ్యూనిటీలు, స్టేటస్ వంటి ముఖ్యమైన ఫీచర్‌లను సులభంగా, వేగంగా యాక్సెస్ చేయడానికి వాట్సాప్లో మార్పులు కావాలని వినియోగదారులు కోరుతున్నారు. యాప్‌ను నావిగేట్ చేయడానికి మరింత ఆధునిక, స్పష్టమైన మార్గాన్ని వినియోగదారులు కోరుతున్నారు" అని వాట్సాప్ ప్రతినిధులు తెలిపారు. వినియోగదారుల కోరిక మేరకే వాట్సాప్ ఇంటర్ఫేస్లో మార్పులు జరుపుతున్నట్లు వాట్సాప్ ప్రతినిధులు వెల్లడించారు. కొద్ది రోజుల్లోనే వాట్సాప్ కొత్త ఆండ్రాయిడ్ వెర్షన్ అప్డేట్ను తీసుకువస్తామని వారు పేర్కొన్నారు.
