సల్మాన్ ఖాన్కు బెదిరింపుల వ్యవహారంలో రోజుకో షాకింగ్ విషయం బయటకు వస్తోంది. ఈ కేసులో పోలీసులు అరెస్టు చేసిన సిద్ధేశ్ కాంబ్లే అలియాస్ మహాకాల్.. ఓ సంచలన విషయాన్ని వెల్లడించాడు. సల్మాన్కు బెదిరింపులే కాక.. అతడిని హత్య చేసేందుకు ప్రయత్నాలు జరిగినట్లు తెలిపాడు. అందుకోసం సంపత్ నెహ్రా అనే రౌడీని ముంబయికి పంపించినట్లు పేర్కొన్నాడు.
"సంపత్ నెహ్రా.. గ్యాంగ్స్టర్ లారెన్స్ బిష్ణోయ్కి రైట్ హ్యాండ్. సల్మాన్ను చంపడానికి లారెన్సే అతడిని ముంబయి పంపించాడు." అని మహాకాల్ పోలీసులకు తెలిపాడు. అనంతరం లారెన్స్ను కూడా ప్రశ్నించారు పోలీసులు. "2021లో సల్మాన్ను చంపేందుకు కుట్ర పన్నినట్లు లారెన్స్ తెలిపాడు. దానికోసం రాజస్థాన్ గ్యాంగ్స్టర్ సంపత్ నెహ్రాకు సుపారీ ఇచ్చినట్లు వెల్లడించాడు" అని పోలీసులు పేర్కొన్నారు.
బతికిపోయిన సల్మాన్!: "కుట్రలో భాగంలో ముంబయిలో రెక్కీ చేశాడు సంపత్. షూట్ చేసే అవకాశాన్ని దక్కించుకున్నాడు. అయితే సల్మాన్ ఉన్న దూరానికి తన వద్ద ఉన్న గన్తో కాల్పులు జరిపేందుకు వీలులేకపోవడం వల్ల అతడు బతికిపోయాడు. అనంతరం తన గ్రామానికి చెందిన ఓ జవాన్ను సంప్రదించి.. సల్మాన్ను కాల్చేందుకు ఓ రింగ్ రైఫిల్ను ఆర్డర్ చేశాడు సంపత్. అయితే అది వచ్చేలోపే సంపత్ను అరెస్టు చేశాం." అని పోలీసులు తెలిపారు.
ఇవీ చూడండి: 'సల్మాన్ ఖాన్ హత్య బెదిరింపులు వారి పనే.. త్వరలోనే అరెస్ట్ చేస్తాం'
