ఏపీలో తెనాలి పట్టణంలోని ఉప్పు బజార్లో ఇద్దరు బాలురి మధ్య వాగ్వాదం కత్తి పోటుకు దారి తీసింది. పునుగుల విషయంలో తలెత్తిన గొడవలో 16 ఏళ్ల బాలుడిని 10 సంవత్సరాల బాలుడు కత్తితో పొడిచి పారిపోయాడు. బాధితుణ్ని స్థానికులు తక్షణమే తెనాలి ప్రభుత్వ ఆసుపత్రికి తరలించారు.
మెరుగైన చికిత్స కోసం బాలుడిని గుంటూరు ప్రభుత్వ ఆసుపత్రిలో చేర్చారు. తీవ్ర గాయాలపాలైన ఆ బాలుడి పరిస్థితి... విషమంగా ఉందని వైద్యులు తెలిపారు. బాధితుడి తల్లి ఫిర్యాదు మేరకు కేసు నమోదు చేసుకున్న తెనాలి ఒకటో పట్టణ పోలీసులు.. దర్యాప్తు చేస్తున్నారు.
పునుగుల వద్ద గొడవ..
ఇద్దరు స్నేహితులు పునుగులు తింటుండగా.. వారి వద్దకు పదేళ్ల బాలుడు వెళ్లాడు. వారిలో ఒకరు.. అతనికి ఓ పునుగు ఇవ్వడంతో నేనేమైనా అడుక్కునే వాడినా అంటూ ఆ పదేళ్ల బాలుడు గొడవకు దిగాడు. ఈ క్రమంలో 16 ఏళ్ల బాలుడు పదేళ్ల బాలుడిని చెంపదెబ్బ కొట్టి అక్కణ్నుంచి పంపించాడు. అక్కడ నుంచి వెళ్లినట్టే వెళ్ళిన పదేళ్ల బాలుడు.. తిరిగి వచ్చి.. తనను కొట్టినతనిపై కత్తితో దాడి చేసి పరారయ్యాడు.
