కార్పొరేట్ సంస్థల త్రైమాసిక ఫలితాల ప్రకటన దాదాపు ముగింపు దశకు చేరుకుంది. ఈ నేపథ్యంలో స్టాక్ మార్కెట్లకు ఈ వారం కరోనా సంబంధిత వార్తలు, అంతర్జాతీయ పరిణామాలే కీలకం కానున్నాయని చెబుతున్నారు విశ్లేషకులు.
దేశంలో కరోనా కేసుల తీవ్రత కాస్త తగ్గుముఖం పడుతుండటం, కొత్త వ్యాక్సిన్లు మార్కెట్లోకి వస్తుండటం వంటివి మదుపరుల సెంటిమెంట్ను బలపరిచే అంశాలని చెబుతున్నారు నిపుణులు. అయినప్పటికీ రోజువారీ కరోనా కేసులపై మదుపరులు అధికంగా దృష్టిసారించొచ్చంటున్నారు. అయితే ఈ వారమే డెరివేటివ్ కాంట్రాక్టులు ముగియనున్న నేపథ్యంలో ఒడుదొడుకులకు అవకాశం లేకపోలేదని అభిప్రాయపడుతున్నారు.
'అంతర్జాతీయ పరిణామాల వల్ల బ్యాంకింగ్, ఆర్థిక షేర్లు కాస్త రికవరీ అవుతున్నాయి. ఇతర రంగాలు కూడా లాభాల్లోకి రావాల్సి ఉంద'ని రెలిగేర్ బ్రోకింగ్ ఉపాధ్యక్షుడు అజిత్ మిశ్రా పేర్కొన్నారు.
బీపీసీఎల్, సన్ ఫార్మా, సెంట్రల్ బ్యాంక్ ఆఫ్ ఇండియా సహా పలు ఇతర సంస్థలు ఈ వారమే 2020-21 క్యూ4, వార్షిక ఫలితాలు ప్రకటించనున్నాయి. ఈ ఫలితాల ప్రభావం ఆయా సంస్థల షేర్లపై ప్రధానంగా ఉండనుంది.
వీటన్నింటితో పాటు రూపాయి మారకం విలువ, విదేశీ పెట్టుబడుల ట్రెండ్, ముడి చమురు ధరల హెచ్చుతగ్గులు మార్కెట్లను ప్రభావితం చేసే సాధారణ అంశాలుగా ఉండనున్నాయి.
ఇదీ చదవండి:మళ్లీ పెట్రో బాదుడు- ఈ నెలలో పన్నెండోసారి
