చుక్కలు చూపిస్తున్న చమురు.. బంగారం భగభగ

Crude oil price per barrel: చమురు ధరల విశ్వరూపం కొనసాగుతోంది. సోమవారం బ్రెంట్‌ క్రూడ్‌ బ్యారెల్‌ ధర ఏకంగా 10 డాలర్లు పెరిగి 139.14 డాలర్లను తాకింది. 2008 తర్వాత ఇదే గరిష్ఠ స్థాయి. అనంతరం నెమ్మదించి 125 డాలర్ల వద్ద ట్రేడ్‌ అవుతోంది. అమెరికా క్రూడ్‌ (డబ్ల్యూటీఐ) బ్యారెల్‌ ధర కూడా 6.92 డాలర్లు పెరిగి 122.60 డాలర్లకు చేరింది. 2008 జులై నాటి అమెరికా క్రూడ్‌ బ్యారెల్‌ ధర 145.29 డాలర్లే ఇప్పటికీ గరిష్ఠస్థాయి. రష్యా నుంచి చమురు దిగుమతులపై అమెరికా, ఐరోపా దేశాలు ఆంక్షలు విధించడం, ఇరాన్‌ నుంచి ముడి చమురు ఎగుమతుల పునరుద్ధరణ ఆలస్యం కావొచ్చన్న అంచనాలు ధర భారీగా పెరిగేందుకు దోహదం చేసింది.

ఇదీ కారణమే: రోజూ 3.30 లక్షల బ్యారెళ్ల చమురును అందించే తమ 2 కీలక చమురు క్షేత్రాలను సాయుధ బృందం మూసివేసిందని లిబియాకు చెందిన చమురు కంపెనీ ప్రకటించడం కూడా చమురు ధరలు భగ్గుమనేందుకు కారణమయ్యాయి. రష్యా ఓడరేవుల నుంచి కజకస్థాన్‌ చేసే చమురు ఎగుమతులపైనా ఆంక్షల ప్రభావం కొంత మేర పడొచ్చు.

అమ్మో పసిడి: ముడి చమురు ధరల సెగతో ప్రపంచ స్టాక్‌మార్కెట్లు మాడిపోయాయి. దీంతో సురక్షిత పెట్టుబడి సాధనంగా భావించే పసిడిపైకి పెట్టుబడులు మళ్లడంతో, ఔన్సు (31.10 గ్రాముల) ధర ఒకదశలో 2,000 డాలర్లను మించినా, భారత కాలమానం ప్రకారం రాత్రి 9 గంటల సమయానికి 1980 డాలర్ల వద్ద ట్రేడ్‌ అవుతోంది. దేశీయంగా 10 గ్రాముల మేలిమి బంగారం ధర రూ.54,700, కిలో వెండి రూ.71,600కు చేరింది.

ప్రత్యామ్నాయాలు ఇలా: చమురు సరఫరాలు మెరుగు పరచేందుకు వెనిజువెలాపై ఆంక్షల సడలింపు అంశాన్ని పరిశీలిస్తున్నట్లు అమెరికా అధికారులు చెబుతున్నారు. ఇరాన్‌ నుంచి చమురు దిగుమతుల పునరుద్ధరణకూ చర్చలు నడుస్తున్నాయి. ఇవి సత్వరం అందుబాటులోకి రావడం కష్టమనే అభిప్రాయాన్ని జపాన్‌ పరిశ్రమ సంఘం వ్యక్తం చేసింది. జపాన్‌కు అధికంగా చమురు ఎగుమతి చేసే దేశాల్లో రష్యా ఐదో స్థానంలో ఉంది.

అంచనాలు ఇలా..

"రష్యా నుంచి దిగుమతులపై ఆంక్షలు విధించడం వల్ల రోజుకు 50 లక్షల బ్యారెళ్లు , అంతకుమించి ముడి చమురు సరఫరా లోటు ఏర్పడొచ్చు. ఇందువల్ల బ్యారెల్‌ చమురు ధర 200 డాలర్లకు చేరొచ్చు."

- బ్యాంక్‌ ఆఫ్‌ అమెరికా

బ్యారెల్‌ చమురు ధర ఈ ఏడాది 185 డాలర్లకు పెరిగే అవకాశం ఉంది.

- జేపీ మోర్గాన్‌

"బ్యారెల్‌ చమురు ధర 180 డాలర్లను తాకి, అంతర్జాతీయ సంక్షోభానికి దారి తీయొచ్చు."

- యూఎఫ్‌జే ఫైనాన్షియల్‌ గ్రూపు

• 1- చమురు, చమురు ఉత్పత్తుల ఎగుమతుల్లో ప్రపంచవ్యాప్తంగా రష్యా స్థానం
• 70 లక్షల బ్యారెళ్లు- రష్యా ఒక రోజులో చేసే చమురు, చమురు ఉత్పత్తుల ఎగుమతుల పరిమాణం. అంతర్జాతీయంగా మొత్తం చమురు సరఫరాలో ఇది 7 శాతం.
• 60%- 2022లో అంతర్జాతీయంగా చమురు ధరల్లో పెరుగుదల.

పెట్రోలు, డీజిల్‌ ధరల పెంపు ఈవారంలోనే

ముడిచమురు ధరలకు అనుగుణంగా, పెట్రోలు, డీజిల్‌ ధరలను ఈవారంలోనే చమురు విక్రయ కంపెనీలు పెంచే అవకాశం ఉంది. 5 రాష్ట్రాల ఎన్నికలు ఉండటంతో 4 నెలలుగా పెట్రో రిటైల్‌ ధరలను దేశీయంగా సవరించలేదు. ఇప్పటివరకు ఏర్పడిన నష్టాలను భర్తీ చేసుకోవాలంటే కనీసం లీటరుకు రూ.15 పెంచాల్సిన అవసరం ఉందనే అభిప్రాయాన్ని పరిశ్రమ వర్గాలు వ్యక్తం చేస్తున్నాయి.

చమురు మంటలు

• బ్యారెల్‌ 130 డాలర్లకు చేరిక
• ఏడు నెలల కనిష్ఠానికి సూచీలు
• తొలిసారిగా రూ.77.01కు చేరిన డాలర్‌
• 1491 పాయింట్లు కోల్పోయిన సెన్సెక్స్‌; 16000 దిగువకు నిఫ్టీ
• 4 రోజుల్లో రూ.11.28 లక్షల కోట్లు ఆవిరి

ఉక్రెయిన్‌పై రష్యా యుద్ధ ఫలితంగా ఏర్పడిన ముడిచమురు ధరల మంటల్లో మదుపరి మాడిపోతున్నాడు. బ్యారెల్‌ ముడిచమురు ధర 130 డాలర్లను తాకడం, రూపాయి విలువ జీవనకాల కనిష్ఠానికి పడిపోవడంతో స్టాక్‌మార్కెట్లలో బేర్‌ బీభత్సం సృష్టించింది. ద్రవ్యోల్బణ భయాలకు తోడు వృద్ధి మందగమనం పాలవుతుందనే అంచనాలు మదుపర్ల అమ్మకాలకు కారణమయ్యాయి. డాలర్‌తో పోలిస్తే రూపాయి 76 పైసలు బలహీనపడి 76.93 వద్ద ముగిసింది. ఇంట్రాడేలో రూపాయి 77.01 వద్ద జీవనకాల కనిష్ఠాన్ని తాకింది. విదేశీ మదుపర్లు అమ్మకాలకే మొగ్గుచూపారు. ఆసియా, ఐరోపా మార్కెట్లు నష్టాల్లో ట్రేడయ్యాయి.

మార్కెట్‌ పతనంతో గత నాలుగు ట్రేడింగ్‌ రోజుల్లో రూ.11.28 కోట్ల మదుపర్ల సంపద ఆవిరైంది. బీఎస్‌ఈలో నమోదిత కంపెనీ మార్కెట్‌ విలువ రూ.241.10 లక్షల కోట్లకు చేరింది.

ఇదీ చూడండి: ఎన్​ఎస్​ఈలో మరోసారి సాంకేతిక సమస్య.. బ్రోకర్ల అనుమానాలు