ఉత్తరాఖండ్ పౌరీ జిల్లాలో ఘోర రోడ్డు ప్రమాదం జరిగింది. రిఖినికల్- బిరోఖాల్ రహదారిపై వెళ్తున్న ఓ పెళ్లి బస్సు అదుపుతప్పి 300 మీటర్ల లోతున్న నాయర్ నదిలో పడిపోయింది. ఈ ఘటనలో ఇప్పటి వరకు ఆరుగురు ప్రాణాలు కోల్పోయారు. మిగతా వారి కోసం రెస్క్యూ టీమ్ సభ్యులు గాలిస్తున్నారు. ఈ బస్సులో సుమారు 50 మంది ప్రయాణికులు ఉన్నట్లు తెలుస్తోంది. పోలీసులు ఘటనా స్థలానికి చేరుకుని.. సహాయక చర్యలు కొనసాగిస్తున్నారు.
మంగళవారం రాత్రి 7.30 గంటల ప్రాంతంలో ఈ ప్రమాదం జరిగిందని పోలీసులు తెలిపారు. స్థానికుల సహాయంతో సహాయక చర్యలు ప్రారంభించామని పేర్కొన్నారు. అయితే చీకటి కారణంగా సహాయక చర్యలకు అంతరాయం కలుగుతోందని వెల్లడించారు. ఘటనాస్థలిలో వెలుతురు కోసం స్థానికులు తమ ఫోన్ ఫ్లాష్లైట్లను వేసి లోయలో పడినవారి కోసం వెతుకుతున్నారని చెప్పారు.
