ఒడిశాలోని జగత్సింగ్పుర్ జిల్లలోని ఫాస్ట్ట్రాక్ కోర్టు ఓ సంచలన తీర్పు వెలువరించింది. ఎనిమిదేళ్ల చిన్నారిని అత్యాచారం చేసిన కేసులో ఇద్దరు నిందితులకు మరణ శిక్ష విధించినట్లు కోర్టు తెలిపింది.
వివరాలు ఇలా...
తీర్తోల్ పోలీస్ స్టేషన్ పరిధిలో చాక్లెట్లు కొనుక్కుని ఇంటికి వెళ్తున్న ఓ ఎనిమిదేళ్ల చిన్నారిని గుర్తుతెలియని నలుగురు వ్యక్తులు అపహరించారు. ఆపై తనను ఓ నిర్మానుష్యమైన ప్రదేశానికి తీసుకెళ్లి అత్యాచారానికి పాల్పడి చంపేశారు. 2014లో జరిగిన ఈ ఘటనకు సంబంధించిన తీర్పును తాజాగా వెలువరించింది కోర్టు. అయితే ఇద్దరు నిందితులైన షేక్ ఆసిఫ్తో పాటు షేక్ ఆలిక్కు మరణ శిక్ష విధించగా మరో ఇద్దరికి వ్యతిరేకంగా సాక్ష్యాధారాలు లేనందున వారిని విడుదల చేసినట్లు తెలిపింది.
కుక్కపిల్లను రాళ్లతో కొట్టి చంపిన వ్యక్తి..
ఉత్తర్ప్రదేశ్లోని బదాయూ జిల్లాలో మంగళవారం మరో అమానీవయ ఘటన వెలుగులోకి వచ్చింది. ఇటీవలే ఎలుక తోకకు రాయి కట్టి చంపిన ఉదంతం మరువక మందే మరో మూగజీవి ప్రాణాలను బలిగొన్నాడు ఓ వ్యక్తి. ఇందుకు సంబంధించిన ఓ వీడియో సోషల్ మీడియాలో వైరల్గా మారింది. ఈ ఘటనపై జంతు ప్రేమికులు తీవ్ర ఆగ్రహం వ్యక్తం చేస్తున్నారు.
నిందితుడు.. కుక్కపిల్లపై విచక్షణ రహితంగా రాళ్లతో దాడి చేశాడు. దాని మూగ సైగతో ఎంత మొత్తుకున్న వినని ఆ దుర్మార్గుడు ఆఖరికి దాన్ని అంతమొందించాడు. ఆ తర్వాత శునకాన్ని పూడ్చి పెట్టాడు. దీన్నంతటిని ఎవరో చిత్రీకరించి సామాజిక మాధ్యమాల్లో షేర్ చేశారు. విషయం తెలుసుకున్న జంతు ప్రేమికుడు వికేంద్ర శర్మ పోలీసులకు ఫిర్యాదు చేశాడు. ఆ కుక్కపిల్ల మృతదేహాన్ని వెలికితీసి శవ పరీక్షకు పంపించారు. విచారణ జరిపిన పోలీసులు.. నిందితుడిని ముకేశ్ కుమార్గా గుర్తించారు. విచారణలో తాను తప్పు చేసినట్లు ఒప్పుకున్న ఆ వ్యక్తి.. తన పిల్లలతో పాటు మరో ఇద్దరు చిన్నారులను కుక్క కరిచినందున ఈ పని చేశానని తెలిపాడు.
నవజాత శిశువు మృతదేహాన్ని పీక్కుతిన్న కుక్కలు..
కేరళలోని మలప్పురంలో ఓ నవజాత శిశువు మృతదేహాన్ని వీధి కుక్కలు పీక్కు తిన్నాయి. మలప్పురంలోని చెన్నక్కాల్లోని ఓ ఇంటి వద్ద కాకులు విపరీతంగా అరవడాన్ని గమనించిన యజమాని.. ఆ చిన్నారిని చూసి షాక్కు గురయ్యాడు. అప్పటికే కుక్కలు ఆ మృతదేహాన్ని చీల్చి ముక్కలు చేశాయి. దీంతో వారు పోలీసులకు సమాచారం అందించారు. ఘటనా స్థలానికి చేరుకుని మృతదేహాన్ని స్వాధీనం చేసుకున్న పోలీసులు.. శవ పరీక్ష నిమిత్తం తరలించారు. ఈ శవం ఇక్కడ మూడు రోజుల క్రితం నుంచి ఉండవచ్చని భావిస్తున్నారు. అయితే ఈ చిన్నారిని ఇక్కడ ఎవరు వదిలి వెళ్లారన్న కోణంలో కేసు నమోదు చేసుకున్న పోలీసులు దర్యాప్తు ప్రారంభించారు.
