సాధారణంగా కోర్టు.. ఖైదీలకు పెరోల్ మంజూరు చేయడం మనం చూస్తూనే ఉంటాం. అయితే.. తల్లి కావాలన్న భార్య కోరికను తీర్చేందుకు ఓ దోషికి పెరోల్ మంజూరు చేసింది రాజస్థాన్ హైకోర్టు. దోషి భార్య వేసిన పిటిషన్ను పరిశీలించిన ధర్మాసనం ఈ నిర్ణయం తీసుకుంది. మైనర్ను అపహరించి అత్యాచారానికి పాల్పడిన కేసులో 20 ఏళ్ల జైలు శిక్ష అనుభవిస్తున్న రాహల్(25)ను విడుదల చేయాలని జస్టిస్ సందీప్ మెహతా, జస్టిస్ సమీర్ జైన్తో కూడిన డివిజన్ బెంచ్ ఆదేశించింది. రూ.2 లక్షలతో వ్యక్తిగత పూచీకత్తు సహా రూ.లక్ష చొప్పున రెండు ష్యూరిటీ బాండ్లు సమర్పించాలని ఖైదీకి స్పష్టం చేసింది.
''దోషి భార్య తల్లి కావాలని కోరుకుంటోంది. తన భర్త లేకుండా, తన భర్త నుంచి ఎలాంటి పిల్లలు కలగకుండా ఉండే పరిస్థితుల్లో ఆమె జీవించకూడదు. ముఖ్యంగా ఆమె తన వంశ పరిరక్షణ కోసం ఈ పిటిషన్ దాఖలు చేసింది. ఆ మహిళ పిటిషన్ను తిరస్కరిస్తే ఆమె హక్కులను నిరాకరించినట్లే అవుతుంది. అందుకే.. దోషికి 15 రోజుల పెరోల్ మంజూరు చేస్తున్నాం"
- రాజస్థాన్ హైకోర్టు
గతంలోనూ రాజస్థాన్ హైకోర్టు ఇలాంటి తీర్పు ఇచ్చింది. జీవిత ఖైదు అనుభవిస్తున్న ఓ దోషి భార్య.. తల్లి కావాలన్న కోరికను తీర్చేందుకు అతడికి 15 రోజుల పెరోల్ మంజూరు చేసింది. అమాయకురాలైన ఖైదీ భార్య వైవాహిక జీవితం ప్రభావితం కాకూడదని ఈ నిర్ణయం తీసుకున్నట్లు కోర్టు పేర్కొంది. ఏ మహిళ అయినా తల్లి అయినప్పుడే జీవితం పరిపూర్ణం అవుతుందని బెంచ్ ఈ సందర్భంగా వ్యాఖ్యలు చేసింది. 16 మతకర్మలలో బిడ్డను కనడం మహిళకు మొదటి హక్కు అని నొక్కిచెప్పింది. ఈ పూర్తి వార్త కోసం ఇక్కడ క్లిక్ చేయండి.
