నోబెల్ శాంతి బహుమతి విజేత ఆంగ్సాన్ సూకీకి ప్రధాన మంత్రి నరేంద్ర మోదీ అభినందనలు తెలిపారు. మయన్మార్ ఎన్నికల్లో ఆమె పార్టీ నేషనల్ లీగ్ ఫర్ డెమొక్రసీ(ఎన్ఎల్డీ) గెలుపొందిన నేపథ్యంలో ప్రధాని ట్వీట్ చేశారు. ఇరు దేశాల మధ్య సంబంధాలను బలోపేతం చేయడానికి కట్టుబడి ఉన్నట్లు స్పష్టం చేశారు.
అనధికారిక గణాంకాల ప్రకారం.. పార్లమెంటులో మెజారిటీ సీట్లను ఎన్ఎల్డీ గెల్చుకుంది. ఫలితంగా.. మరో ఐదేళ్లు సూకీ మయన్మార్ పగ్గాలు చేపట్టేందుకు మార్గం సుగమమైంది.
''ఎన్నికల్లో ఘనవిజయం సాధించినందుకు ఆంగ్సాన్ సూకీ, ఎన్ఎల్డీకి అభినందనలు. ప్రస్తుత పరిస్థితుల్లో మయన్మార్లో ఎన్నికలను నిర్వహించడం గొప్ప విషయం. ఇరు దేశాల సంబంధాలను బలోపేతం చేసే దిశగా మీతో కలిసి పనిచేసేందుకు ఎదురుచూస్తున్నా''
- నరేంద్ర మోదీ, భారత ప్రధానమంత్రి
ఈ ఎన్నికల్లో 90కి పైగా పార్టీలు పోటీపడ్డాయి. 3.7 కోట్ల మంది వరకు తమ ఓటుహక్కును వినియోగించుకున్నారు. వారిలో 50 లక్షల మంది యువ ఓటర్లే.
2015లో ఆమె నేతృత్వంలోని ఎన్ఎల్డీ పార్టీ ఘన విజయాన్ని సొంతం చేసుకుంది. ఐదు దశాబ్దాలకు పైగా ఉన్న సైనిక పాలనకు తెరదించింది.
