'పాకిస్థాన్ మాకు రెండో ఇల్లు' అంటూ ఆ దేశంతో ఉన్న తమ అనుబంధాన్ని తాలిబన్(Taliban pakistan relations) ప్రతినిధులు ఇటీవలే బహిరంగంగా వెలిబుచ్చారు. అయితే, తాలిబన్లకే కాదు అనేక ఉగ్రవాద సంస్థలకు పాకిస్థాన్ సొంతింటిగా వ్యవహరిస్తున్న విషయం తెలియందేం కాదు. ఇప్పుడు కాబుల్లో జరిగిన ఉగ్రదాడిలోనూ పాకిస్థాన్ హస్తం బట్టబయలైంది.
గురువారం కాబుల్ ఎయిర్పోర్ట్ సమీపంలో ఐసిస్-కే ఉగ్ర సంస్థ ఆత్మాహుతి దాడులు(isis kabul attack) జరిపింది. ఈ ఘటనలో 169 మంది అఫ్గాన్ పౌరులతో పాటు 13 మంది అమెరికా సైనికులు ప్రాణాలు కోల్పోయారు. అమెరికా అధికారుల అంచనా ప్రకారం ఈ దాడిలో 11 కేజీల ఆర్డీఎక్స్ను ఉపయోగించారు.
దాడిలో ఉపయోగించిన మందుగుండు సామగ్రి అత్యంత ప్రమాదకరమైనది. బుల్లెట్ ప్రూఫ్ జాకెట్, హెల్మెట్ సహా అమెరికా సైన్యం ధరించే అత్యుత్తమ రక్షణ సాధనాలను ధ్వంసం చేయగలిగే నాణ్యమైన పేలుడు పదార్థాలను ఇందులో ఉపయోగించారు. పేలుడు తీవ్రతను పెంచేందుకు అమ్మోనియం నైట్రేట్ను ఆర్డీఎక్స్తో కలిపి ఉపయోగించినట్లు తెలుస్తోంది.
'ఐసిస్-కే'కు పేలుడు పదార్థాలు ఎక్కడి నుంచి వచ్చాయి?
అయితే, ఆత్మాహుతి దాడులు చేసేందుకు ఐసిస్కు ఇలాంటి నాణ్యమైన పేలుడు పదార్థాలు ఎక్కడి నుంచి వస్తాయనే ప్రశ్న ఉత్పన్నం కాక మానదు. ఈ ప్రశ్నకు సంక్షిప్త సమాధానం.. 'పాకిస్థాన్'. అవును.. ఐసిస్-కే పాల్పడే దాడుల్లో చాలా వరకు పాకిస్థాన్లో తయారైన పేలుడు పదార్థాలనే(rdx pakistan) వినియోగిస్తున్నారు. పెషావర్, క్వెట్టా నగరాల నుంచి బాంబులకు కావాల్సిన సామగ్రి ఐసిస్కు సరఫరా అవుతోంది. తలకు చుట్టుకునే పాగాలలో, కూరగాయల బండ్లలో పేలుడు పదార్థాలను నింపి.. వాటిని సరిహద్దు దాటిస్తున్నారు. పేలుడు పదార్థాలతో పాటు డబ్బును సైతం(pakistan terror financing) ఇలాగే పంపిస్తున్నారు.
ఈ విషయాలన్నీ కాబుల్లోని అఫ్గాన్ ఇన్స్టిట్యూట్ ఫర్ స్ట్రాటజిక్ స్టడీస్(ఏఐఎస్ఎస్) తన నివేదికలో వెల్లడించింది. అఫ్గానిస్థాన్ ప్రభుత్వంలో పనిచేసిన అధికారులతో పాటు ఐసిస్ ఉగ్రవాదులను ఇంటర్వ్యూ చేసి ఈ నివేదిక రూపొందించింది. ఇందులోని కీలకాంశాలు చూస్తే ఆశ్చర్యం కలగకమానదు.
- ఐసిస్-కే సభ్యుల్లో 90 శాతం మంది పాకిస్థాన్, అఫ్గానిస్థాన్కు చెందినవారే. ఐసిస్-కే ఫైటర్లలో 'తెహ్రీక్ ఇ తాలిబన్ పాకిస్థాన్'కు చెందిన వారే అధికం.
- ఐసిస్-కే ఉపయోగించే ఆయుధాలు, వాటి నాణ్యతను పరిశీలిస్తే.. భౌగోళికంగా దగ్గరగా ఉన్న దేశమే వీటిని సరఫరా చేసినట్లు స్పష్టమవుతోంది. వీటిపై ఐసిస్ సభ్యులను ప్రశ్నిస్తే.. తమ ఆయుధాలు పాకిస్థాన్లో తయారయ్యాయని చెప్పారు.
- ఏకే 47కు నకిలీలను తయారు చేసి అఫ్గాన్ వ్యాప్తంగా ఉన్న ఐసిస్-కేకు సప్లై చేస్తున్నారు. ఐసిస్కు పాకిస్థాన్ అండగా ఉంటోందన్న విషయాన్ని ఇవన్నీ స్పష్టంగా తెలియజేస్తున్నాయి. అక్కడి ప్రభుత్వం మాత్రం ఇలాంటి కార్యకలాపాలపై శీతకన్ను వేసింది.
- నైట్రోజన్ ఆధారిత వ్యవసాయ ఫర్టిలైజర్లు.. మైనింగ్, నిర్మాణ రంగంలో వాడే అమ్మోనియం నైట్రేట్ వంటి రసాయనాలను పేలుడు పదార్థాలు తయారు చేసేందుకు ఉపయోగిస్తున్నారు. ఆర్డీఎక్స్తో కలిపి వీటిని వినియోగించి పేలుడు తీవ్రతను పెంచుతున్నారు.
- భారత్లో అనేక ఉగ్రదాడులు ఈ విధంగానే జరిగాయి. పుల్వామా ఆత్మాహుతి దాడిలోనూ అమ్మోనియం నైట్రేట్-ఆర్డీఎక్స్ మిశ్రమాన్నే ఉపయోగించారు.
ఐసిస్-కే అంటే?
ఇస్లామిక్ స్టేక్ ఖోరసన్ ప్రావిన్స్(isis khorasan)... దీన్నే ఐసిస్-కే, ఐసిస్కేపీ, ఐఎస్కే అని కూడా పిలుస్తుంటారు. ఇస్లామిక్ స్టేట్ ఆఫ్ ఇరాక్, సిరియా(ఐసిస్) ఉగ్రసంస్థకు ఇది అనుబంధ సంస్థ. పాకిస్థానీ తాలిబన్ మాజీ సభ్యులు, అఫ్గాన్ తాలిబన్, ఉజ్బెకిస్థాన్ ఇస్లామిక్ ఉద్యమకారులు ఐసిస్-కేను(isis-k leadership) 2015 జనవరిలో ఐసిస్-కేను స్థాపించారు. అతి తక్కువ కాలంలో ఉత్తర, ఈశాన్య అఫ్గాన్లోని గ్రామీణ జిల్లాలు సహా ప్రాదేశిక నియంత్రణను ఏకీకృతం చేసింది. మొదటి మూడేళ్లలో అఫ్గాన్, పాకిస్థాన్లోని మైనారిటీ వర్గాలు, ప్రభుత్వ సంస్థలు లక్ష్యంగా దాడులతో రెచ్చిపోయింది. 2018 నాటికే ప్రపంచంలోని అత్యంత ప్రమాదకర ఉగ్రసంస్థల్లో నాలుగో స్థానంలో నిలిచింది. ఇస్లామిక్ స్టేట్ ఉద్యమాన్ని మధ్య, దక్షిణాసియాకు విస్తరించడమే ఐసిస్-కే లక్ష్యం.
భారత్లోనూ ఐసిస్-కే విభాగం కార్యకలాపాలు సాగిస్తోంది. 2019 మే 10న ఐసిస్-కే నుంచి వేరువడి వలియాత్ అల్-హింద్ పేరుతో నడుస్తోంది. 2019 అక్టోబర్లోనే ఈ ముఠా పూర్తిగా పతనమైందని జమ్ము కశ్మీర్ పోలీసులు ప్రకటించినా.. వీరు ఇంకా క్రియాశీలంగానే ఉన్నారని అనంతరం వెలువడిన పలు మీడియా కథనాలు పేర్కొంటున్నాయి.
ఇదీ చదవండి:
