Covid Restrictions: దేశవ్యాప్తంగా కరోనా కేసులు తగ్గుముఖం పడుతున్న నేపథ్యంలో పలు రాష్ట్రాలు ఆంక్షలను ఎత్తివేస్తున్నాయి. కొత్త కేసులు, పాజిటివిటీ రేటు ధోరణిని పరిగణనలోకి తీసుకొని ఆంక్షలను సవరించాలని లేదా పూర్తిగా తొలగించాలని బుధవారం కేంద్ర ప్రభుత్వం స్పష్టంచేసింది. ఈ క్రమంలో హరియాణాలోని అన్ని కొవిడ్ నిబంధనలను ఎత్తివేస్తున్నట్లు ఆ రాష్ట్ర ప్రభుత్వం ప్రకటించింది. అయితే ప్రజలు మాత్రం కరోనా జాగ్రత్తలను పాటించాలని స్పష్టంచేసింది.
ఉత్తరాఖండ్లోనూ..
రోజూవారీ కరోనా కేసులు తగ్గుముఖం పడుతున్న నేపథ్యంలో నెలన్నరగా కొనసాగుతున్న రాత్రి కర్ఫ్యూను బుధవారం ఎత్తివేసింది ఉత్తరాఖండ్ ప్రభుత్వం. అంతేగాక జిమ్లు, షాపింగ్మాల్స్, సినిమా హాల్స్, స్పాలు, సెలూన్స్, థియేటర్లు, ఆడిటోరియాలు ఇతర సమావేశ మందిరాలను పూర్తి సామర్థ్యంతో నిర్వహించుకోవచ్చని స్పష్టంచేసింది.
అయితే స్విమ్మింగ్పూల్స్, వాటర్ పార్క్స్ మాత్రం ఫిబ్రవరి 28 వరకు మూతబడే ఉండనున్నాయి. ఎన్నికల ర్యాలీలు, ధర్నాలపై నిషేధం కూడా ఈ నెల 28 వరకు కొనసాగనుంది. హోటల్స్, రెస్టారెంట్స్ పూర్తి సామర్థ్యంతో నిర్వహించవచ్చని, అయితే కొవిడ్ నిబంధనలను తప్పనిసరిగా పాటించాలని సర్కారు తెలిపింది.
ఇదీ చూడండి: 'ఆ ఆంక్షలు ఎత్తేయండి!'.. రాష్ట్రాలకు కేంద్రం కీలక సూచన
