Guru Gobind Singh Jayanti: 10వ సిక్కుమత గురువు గురు గోవింద్ సింగ్ 355వ జయంతి సందర్భంగా శుభాకాంక్షలు తెలిపారు ప్రధాని నరేంద్రమోదీ. గురు గోవింద్ జీవిత సారాంశం లక్షలమందికి ధైర్యాన్నిస్తుందని ట్వీట్ చేసిన మోదీ.. ఇకపై ఏటా డిసెంబర్ 26న 'వీర్ బాల్ దివస్' జరుపుకోవాలని పిలుపునిచ్చారు.
మొఘలులు ఉరితీసిన గురు గోవింద్ సింగ్ నలుగురు కుమారులకు (సాహిబ్జాదా) ఇదే ఘనమైన నివాళి అని మోదీ అన్నారు. దేశం కోసం ప్రాణాలు అర్పించిన సాహిబ్జాదా జొరావర్ సింగ్, సాహిబ్జాదా ఫతేసింగ్లను స్మరిస్తూ వీర బాలల దినోత్సవం నిర్వహించనున్నట్లు ట్వీట్ చేశారు. వీరు వీర మరణాన్ని ఎంచుకున్నారని పేర్కొన్నారు.
''మాతా గుజ్రీ, శ్రీ గురు గోవింద్ సింగ్, వారి నలుగురు సాహిబ్జాదాల ధైర్యసాహసాలు, ఆలోచనలు.. కోట్లాది ప్రజలకు బలాన్ని చేకూర్చుతాయి. వారెప్పుడూ అన్యాయానికి తలవంచలేదు. వారి గురించి ప్రజలు చాలా తెలుసుకోవాల్సిన అవసరం ఉంది.''
- నరేంద్ర మోదీ, ప్రధాన మంత్రి
గతంలో పట్నాలో గురుగోవింద్ సింగ్కు నివాళులు అర్పించిన ఫొటోలను మోదీ షేర్ చేశారు.
" గురు గోవింద్ సింగ్ జయంతి సందర్భంగా అందరికి శుభాకాంక్షలు. గురు జీవిత సారాంశం లక్షలమందికి ధైర్యాన్నిస్తుంది. 350వ ప్రకాశ్ పురబ్ను ఘనంగా నిర్వహించేందుకు మా ప్రభుత్వానికి అవకాశం రావడం అదృష్టంగా భావిస్తున్నా."
-- ప్రధాని నరేంద్ర మోదీ
రక్షణమంత్రి రాజ్నాథ్సింగ్ కూడా ప్రకాశ్ పురబ్ సందర్భంగా శుభాకాంక్షలు తెలిపారు.
"శ్రీ గురు గోవింద్ సింగ్ 355వ జయంతి సందర్భంగా నేను ఆయనకు శిరస్సు వంచి నమస్కరిస్తున్నా. ధైర్యసాహసాలకు ఆయన పెట్టింది పేరు. అణగారిన వర్గాలకు ఆయన చేసిన సేవలు ప్రపంచవ్యాప్తంగా గౌరవం పొందాయి. ఆయన సందేశాలు, త్యాగాలు మన సమాజం ఎప్పటికీ రుణపడి ఉంటుంది."
-- రక్షణమంత్రి రాజ్నాథ్సింగ్
ప్రకాశ్ పురబ్(గురు గోవింద్ సింగ్ జయంతి) సందర్భంగా వారాంతపు కర్ఫ్యూలో భక్తులకు సడలింపు ఇచ్చింది దిల్లీ ప్రభుత్వం.
ప్రకాశ్ పురబ్ను పురస్కరించుకుని భక్తులు దిల్లీలోని గురుద్వారా సిస్గంజ్ సాహిబ్ మందిరానికి తరలివస్తున్నారు. అటు పంజాబ్, అమృత్సర్లోని స్వర్ణదేవాలయానికీ భక్తుల తాకిడి పెరిగింది.
ఇదీ చూడండి: ఆసక్తి రేపుతున్న 5 రాష్ట్రాల ఎన్నికలు.. యూపీపైనే అందరి కళ్లు
