సుమారు ఆరు నెలల తర్వాత శబరిమల అయ్యప్ప ఆలయంలోకి భక్తులను అనుమతించనున్నారు. కొవిడ్ కారణంగా మార్చి 24 నుంచి భక్తులకు దర్శనాలను నిలిపివేశారు. అయితే, నెలలో ఐదు రోజులు పూజలు నిర్వహించాలని ట్రావెన్కోర్ దేవస్థానం బోర్డు నిర్ణయించింది.
ఈ క్రమంలో శుక్రవారం(16వ తేదీ) సాయంత్రం 5 గంటలకు ఆలయాన్ని తెరవనున్నారు. భక్తలను మాత్రం శనివారం(17వ తేది) ఉదయం 5 గంటల నుంచి దర్శనానికి అనుమతినిస్తారు.
నెగెటివ్గా తేలిన వారే..
భక్తులందరూ తప్పనిసరిగా కొవిడ్ నిబంధనలు పాటించాల్సిందేనని స్పష్టం చేశారు కేరళ ముఖ్యమంత్రి పినరయి విజయన్. భక్తులకు ఎలాంటి అసౌకర్యం కలగకుండా చర్యలు తీసుకున్నామని తెలిపారు.
" దర్శనానికి వచ్చే భక్తులు 48 గంటల ముందు తప్పనిసరిగా కొవిడ్ పరీక్షలు చేయించుకోవాలి. ఫలితాల్లో నెగెటివ్ వచ్చినవారికే అనుమతి ఉంటుంది. ఆన్లైన్ క్యూపోర్టల్లో భక్తులు ముందుగానే నమోదు చేసుకోవాలి. తాము ఈ తీర్థయాత్రకు అనుకూలమేనని చెప్పే మెడికల్ సర్టిఫికెట్స్ సమర్పించాలి. రోజుకీ 250 మంది భక్తులకు మాత్రమే అనుమతినిస్తున్నాం. "
-- పినరయి విజయన్, కేరళ ముఖ్యమంత్రి.
వడసెర్రికర, ఎరుమేలి మార్గాలు తప్ప మిగతా అన్ని దారులను అధికారులు మూసివేశారు. సన్నిధానం, నిలక్కలోర్ ప్రాంతాల్లో బసకు అనుమతి లేదు. కరోనా వ్యాప్తి దృష్ట్యా అధికారులు ఈ నిర్ణయం తీసుకున్నారు.
ఇదీ చూడండి:కొవిడ్ వేళలో శబరిమల యాత్రకు ఈ నిబంధనలు తప్పనిసరి!
