కేంద్ర ప్రభుత్వం కీలక అజెండాగా తీసుకున్న 5 అంశాలపై చర్చించేందుకు దిల్లీలో అఖిలపక్షం సమావేశమైంది. ప్రధాని నరేంద్ర మోదీ అధ్యక్షత వహించారు. పలు పార్టీల అధినేతలు, ప్రతినిధులు హాజరయ్యారు.
జమిలి ఎన్నికలు, దేశ 75వ స్వాత్రంత్య వేడుకలు సహా పలు అంశాలపై సమాలోచనలు జరుపుతున్నారు. 'ఒకే దేశం-ఒకే ఎన్నిక'పై ప్రధానంగా చర్చ సాగనుంది. లోక్సభ సహా అన్ని రాష్ట్రాల శాసనసభలకు ఒకేసారి ఎన్నికలు నిర్వహించే అంశంపై అన్ని పార్టీల అభిప్రాయాలను కోరనుంది కేంద్రం.
చర్చకు నిర్దేశించుకున్న అంశాలివే...
- పార్లమెంటు ఔన్నత్యాన్ని పెంపొందించడం.
- ఒకే దేశం- ఒకే ఎన్నిక
- 75 ఏళ్ల స్వాతంత్ర్యం సందర్భంగా నవభారత నిర్మాణం
- మహాత్మాగాంధీ 150వ జయంతి వేడుకల నిర్వహణ.
- వెనుకబడిన జిల్లాల అభివృద్ధి.
ఈ ఐదు అంశాలపై చర్చించేందుకు హాజరుకావాలని పార్టీ అధినేతలకు ఇటీవలే ఆహ్వానం పంపింది కేంద్రం.
వీళ్లు దూరం...
కేంద్రం నిర్వహిస్తున్న అఖిలపక్షం భేటీకి పలు పార్టీలు దూరంగా ఉన్నాయి. జమిలి ఎన్నికలపై అసంతృప్తిగా ఉన్న కాంగ్రెస్ సమావేశానికి హాజరుకాలేదు. బంగాల్ సీఎం, తృణమూల్ అధినేత్రి మమతా బెనర్జీ, బీఎస్పీ అధ్యక్షురాలు మాయావతి, డీఎంకే సారథి స్టాలిన్ అఖిల పక్షం భేటీకి దూరంగా ఉండాలని నిశ్చయించుకున్నారు.
ఆమ్ఆద్మీ పార్టీ నుంచి రాఘవ్ చద్దా, తెరాస నుంచి కేటీ రామారావు, తెదేపా నుంచి గల్లా జయదేవ్ ఆయా పార్టీల ప్రతినిధులుగా హాజరయ్యారు.
