సరికొత్త ఫీచర్స్తో వినియోగదారులను పలకరించేందుకు వాట్సాప్ సన్నద్ధమవుతోంది(whatsapp new features). కొత్త ఫీచర్ల కోసం యూజర్లు కూడా ఎంతగానో ఎదురుచూస్తున్నారు. మరి అవేంటో ఓసారి చూద్దాం..
కమ్యూనిటీ
ఒకే రకమైన అభిప్రాయాలు కలిగిన వ్యక్తులు ఒక చోట చేరి తమ ఆలోచనలు పంచుకునేందుకు వీలుగా వాట్సాప్ కమ్యూనిటీ ఫీచర్‌ని(whatsapp community features) తీసుకురానుంది. ప్రస్తుతం ఉన్న వాట్సాప్ గ్రూప్‌ స్థానంలో దీన్ని పరిచయం చేయనున్నట్లు సమాచారం. ఈ ఫీచర్ ద్వారా యూజర్స్ కమ్యూనిటీ లోపల కూడా గ్రూప్స్ క్రియేట్ చేసుకోవడంతోపాటు ఎక్కువమందితో సమాచారాన్ని షేర్ చేసుకోవచ్చట. ప్రస్తుతం పరీక్షల దశలో ఉన్న ఈ ఫీచర్‌ను త్వరలోనే యూజర్స్‌కి అందుబాటులోకి తీసుకురానున్నారు.
వాట్సాప్ ప్లేయర్
వాట్సాప్‌లో మనం పంపే వాయిస్‌ మెసేజ్‌లు విభిన్న వేగంతో వినేందుకు వీలుగా ప్లేయర్ అనే కొత్త ఫీచర్‌ను వాట్సాప్ పరిచయం చేయనుంది. దీని సాయంతో యూజర్స్ తమకు వచ్చిన పెద్ద ఆడియో మెసేజ్‌లను వింటూనే ఇతరులతో ఛాట్ చేసుకోవచ్చు. ఇందుకోసం యూజర్‌ ముందుగా తనకు వచ్చిన ఆడియో మెసేజ్‌ని వాట్సాప్‌లో పిన్ చేసుకోవాలి. తర్వాత ఆడియోని ప్లే చేసి వింటూనే చాట్ కంటిన్యూ చేయొచ్చు.
రెండు మొబైల్స్‌లో ఒకే వాట్సాప్
ఒకే మొబైల్‌లో రెండు వాట్సాప్ యాప్‌లను ఉపయోగించుకోవడం గురించి తెలిసే ఉంటుంది. అలానే ఒకే వాట్సాప్ ఖాతాను రెండు వేర్వేరు మొబైల్స్‌లో ఉపయోగించుకోవచ్చు. ప్రస్తుతం పరీక్షల దశలో ఉన్న ఈ ఫీచర్‌ను మల్టీ డివైజ్‌ సపోర్ట్‌ ఫీచర్‌లో భాగంగా తీసుకురానున్నట్లు సమాచారం. మల్టీ డివైజ్‌ ఫీచర్‌లో అయితే ట్యాబ్‌, డెస్క్టాప్, పీసీతోపాటు ఒక మొబైల్‌లో ఉపయోగించుకోవచ్చు. తాజాగా అందుబాటులోకి రానున్న ఫీచర్‌తో ఒకేసారి రెండు మొబైల్స్‌లో ఉపయోగించవచ్చని టెక్ నిపుణులు అభిప్రాయపడుతున్నారు.
'అబౌట్' నచ్చిన వారికి మాత్రమే
వాట్సాప్ రానున్న రోజుల్లో అబౌట్ సెక్షన్‌లో కీలక మార్పులు చేయనుంది. దీనివల్ల యూజర్‌ అనుమతించిన వారు మాత్రమే వారి ప్రొఫైల్ ఫొటో చూడగలరు. స్టేటస్‌ ఫీచర్ తరహాలోనే ఇందులో మై కాంటాక్ట్స్, మై కాంటాక్ట్స్ ఎక్సెప్ట్‌, నోబడి వంటి ఆప్షన్లు ఉంటాయి. వాటిలో మై కాంటాక్ట్స్ సెలెక్ట్ చేస్తే కాంటాక్ట్ లిస్ట్‌లో ఉన్న అందరూ మీ ప్రొఫైల్ చూస్తారు. మై కాంటాక్ట్స్ ఎక్సెప్ట్‌ అయితే మీరు సెలెక్ట్ చేసిన వారు తప్ప కాంటాక్ట్ లిస్ట్‌లో ఉన్నవాళ్లు మాత్రమే చూస్తారు. నోబడి అయితే ఎవ్వరూ మీ ప్రొఫైల్ ఫొటోను చూడలేరు. ప్రస్తుతం పరీక్షల దశలోఉన్న ఈ పీచర్‌ని త్వరలోనే యూజర్స్‌కి అందుబాటులోకి రానుంది.
పిక్చర్‌-ఇన్‌-పిక్చర్‌కు కొత్త హంగులు
యూట్యూబ్, ఫేస్‌బుక్‌, ఇన్‌స్టాగ్రాం వీడియోల లింక్‌లు వాట్సాప్‌లో ఎన్నో వస్తుంటాయి. వాటిని ఛాట్ పేజ్‌లోనే చూసుకునేందుకు వీడియోపై క్లిక్ చేస్తే సరిపోతుంది. అదే పిక్చర్‌-ఇన్‌-పిక్చర్‌ ఫీచర్. 2018 నుంచి ఈ ఫీచర్ యూజర్స్‌కి అందుబాటులో ఉంది. తాజాగా ఈ ఫీచర్‌లో కీలక మార్పులు చేస్తున్నారని సమాచారం. ఇందులో భాగంగా కంట్రోల్‌ బార్‌ను తీసుకొస్తున్నారట. వీడియోపై క్లిక్ చేస్తే స్క్రీన్‌ కింద వీడియో కంట్రోల్స్‌ కనిపిస్తాయట. వీటితో మనం చూస్తున్న వీడియోను గతంలో కంటే మరింత మెరుగ్గా ఆస్వాదించవచ్చని తెలుస్తోంది.
మీడియా అన్‌డూ బటన్‌
వాట్సాప్‌లో రోజూ మనం ఎన్నో రకాల ఫొటోలు, వీడియోలు పంపుతుంటాం. వాటిలో కొన్నింటిని మనకు నచ్చినట్లుగా ఎడిట్ చేస్తాం. ఒకవేళ మనం చేసిన మార్పులు వద్దనుకుంటే ‘అన్‌డూ’ చేసి ఎప్పటిలానే యథావిధిగా వాటిని పంపొచ్చు. అయితే ఈ అన్‌డూ ఆప్షన్ కేవలం డెస్క్టాప్ వెర్షన్‌లో మాత్రమే అందుబాటులో ఉంది. త్వరలోనే ఈ ఫీచర్‌ని మొబైల్ వెర్షన్‌లో కూడా పరిచయం చేయనున్నారు.
ఎమోజీ రియాక్షన్(emoji reaction in whatsapp)
వాట్సాప్‌లో మనకు వచ్చే మెసేజ్‌లకు టెక్ట్స్‌తో కాకుండా ఎమోజీలతో మన అభిప్రాయాన్ని తెలిపేలా కొత్త ఫీచర్‌ను తీసుకొస్తున్నారు. అయితే ప్రస్తుతం ఉన్న ఎమోజీ, స్టిక్కర్, గిఫ్ పీచర్లకు కొద్దిగా మార్పులు చేసి ఎమోజీ రియాక్షన్ ఫీచర్‌ను తీసుకొస్తున్నారట. దీని వల్ల అవతలి వ్యక్తి మీకు ఎమోజీతో రిప్లై ఇస్తే నోటిఫికేషన్‌లో ఎమోజీ రిప్లై వచ్చినట్లు సందేశం కనిపిస్తుంది.
ఆడియో మెసేజ్‌ ప్రివ్యూ
వాట్సాప్‌లో మనం పంపే ఆడియో మెసేజ్‌లను రికార్డు చేసిన తర్వాత ఏవైనా మార్పులు చేయాలంటే సాధ్యపడదు. ఇక మీదట దీనికి కొత్త ఫీచర్స్ జోడించనుంది వాట్సాప్. మెసేజ్‌ రికార్డ్ చేసిన తర్వాత మనం విని.. అందులో ఏవైనా మార్పులు ఉంటే సదరు మెసేజ్‌ని డిలీట్ చేసి కొత్త ఆడియో మెసేజ్‌ని రికార్డు చేయొచ్చు.
ఇదీ చూడండి:- నయా వాట్సాప్ స్కామ్.. గిఫ్ట్ పేరుతో ఖాతా లూటీ!
