ఒక్క కామెంట్.. ఒకరిని మోడల్గా మార్చేస్తే? కరీనా కఫూర్, అనిల్ కఫూర్ వంటి స్టార్స్తో కలిసి నటించే స్థానానికి చేర్చితే? అబ్బో ఊహే భలే ఉంది కదా! కేరళ ఇడుక్కికి చెందిన ధన్య జీవితంలో ఈ ఊహ నిజం అయింది. ఒక ప్రకటన కింద తాను పెట్టిన కామెంట్తో ఒక్కసారిగా స్టార్గా మారింది.
పాండ్యమక్కల్ ధన్య(21)కు మోడల్ కావడం చిన్ననాటి కల. ఖరీదైన నగలు, దుస్తులు ధరించి నటించటం అంటే ఎంతో ఇష్టం. కానీ ఆమె అరుదైన గుండె జబ్బుతో బాధపడుతోంది. ఆసుపత్రి బెడ్పై ఉండే.. ఓ రోజు మలబార్ జువెలరీ యాడ్ చూసింది ధన్య. అందులో కరీనా కఫూర్, అనిల్ కఫూర్ నటించారు. ఆ యాడ్ కింద 'నాకు అలాగే నటించాలని ఉంది' అని కామెంట్ పెట్టింది ధన్య. దీంతో అడ్వర్టైజ్మెంట్ టీం సభ్యులు ధన్యను కలిసి యాడ్లో నటించమని అడిగారు. మరుసటి వారమే షూటింగ్కు సిద్ధం కావాలని చెప్పారు. యాడ్ షూటింగ్ కోసం కొచ్చికి వెళ్లిన ధన్య.. ఖరీదైన వజ్రాలు, నగలు ధరించి నటించింది.
ధన్య స్టోరీతో ఓ చిన్న వీడియోను సిద్ధం చేశాడు ఫిల్మ్ మేకర్ రోహన్ మాథ్యూ. ఆ వీడియోను కరీనా కఫూర్ తన ఇన్స్టాలో పోస్ట్ చేసింది. అది కాస్తా సామాజిక మాధ్యమాల్లో తెగ వైరల్ అయింది. దీంతో ధన్యకు చాలామంది శుభాకాంక్షలు చెబుతున్నారు.
ఇదీ చదవండి:తాత కోసం బాలిక సాహసం- 240 కి.మీ నడుస్తూ...
