50 Hanuman Temples in Jagital District : హనుమాన్ జయంతి వచ్చిందంటే చాలు ఆ గ్రామంలో ఉండే కోలాహలమే వేరు. ఎటుచూసినా ఆంజనేయస్వామి దేవాలయాలతో ఊరంతా జై శ్రీరామ్ నామస్మరణతో మార్మోగిపోతుంది. ఏ గ్రామానికి లేని విధంగా సుమారు 50 అంజన్న ఆలయాలతో తన విశిష్టతను చాటుకుంటుంది. ఏ వీధిలో చూసిన హనుమాన్ భజనలతో ఆధ్యాత్మిక శోభ విలసిల్లుతుంది. ఆ గ్రామమే జగిత్యాల జిల్లా మెట్పల్లి మండలంలోని వెల్లుల్ల.
వెల్లుల్ల గ్రామంలో వీధికో ఆంజనేయస్వామి గుడి ఉంటుంది. అలా 50కిపైగా ఆలయాలున్నాయి ఇక్కడ. ఈ హనుమాన్ మందిరాల్లో నిత్యం పూజలు చేస్తూ అక్కడి కుటుంబాలు భక్తిభావాన్ని చాటుకుంటున్నాయి. ఇలా ఆ స్వామికి అనుదినం పూజలు చేయడం వల్ల అక్కడ ఏడాదిపాటు సమృద్ధిగా వర్షాలు పడతాయని వారి విశ్వాసం. పాడిపంటలు, ఆ ఊరు ప్రజలంతా బాగుంటారని అక్కడి ప్రజలకు ఆది నుంచి వస్తున్న ఓ నమ్మకం.
కొండగట్టులో వైభంగా హనుమాన్ జయంతి ఉత్సవాలు - రామ నామస్మరణతో మార్మోగుతున్న ఆలయం
అయితే ఊరులో మాత్రం మరో నానుడి ఉంది. కొన్నేళ్ల క్రితం ఇక్కడ అత్యధికంగా బ్రాహ్మణ కుటుంబాల వారు నివసించేవారని, అలా ఎవరికి వారే వాయుపుత్రుడిని పూజించుకునేవారని పెద్దలు చెబుతున్న మాట. ఆ బ్రాహ్మణులు అందరూ వివిధ ప్రదేశాలకు వలసలు వెళ్లిపోవడంతో ఈ ఆలయాలు ఇక్కడ ఉండిపోయాయని చెప్పారు. ప్రతి ఏటా స్వామి వారికి పూజలు చేస్తూ గ్రామంలో హనుమాన్ దీక్షాపరులు పెరుగుతూనే ఉన్నారు. హనుమాన్ జయంతి వచ్చిందంటే చాలు ఈ గ్రామమంతా కాషాయవర్ణంగా మారిపోతుంది.
హనుమాన్ భజనలతో : హనుమాన్ దీక్షాపరుల భజనలు, సంకీర్తనలతో గ్రామమంతా శ్రీరామ నామస్మరణతో నిండిపోతుంది. చిన్నాపెద్దా తేడా లేకుండా అందరూ స్వామివారి మాలధారణ ధరించి 41 రోజుల పాటు నిష్ఠగా స్వామివారి పూజలు చేసుకుంటారు. ప్రతిరోజు ఉదయం రాత్రివేళల్లో ఏ వీధి చూసిన హనుమాన్ దీక్షదారుల భజనలతో నిండిపోతుంటాయి. ఇలా ఈ వెల్లుల్ల గ్రామంలో ఎటుచూసినా ఆ పవనసుతుడే దర్శనమిస్తూ కొత్తగా ఆ ఊరిలోకి వచ్చేవారిని విశేషంగా ఆకట్టుకుంటున్నాడు. అలాగే చుట్టుపక్కల గ్రామాల నుంచి పెద్ద ఎత్తున ప్రజలు హనుమాన్ జయంతికి ఈ ఆలయాలను సందర్శిస్తూ ఉంటారు.
"మా ఊరిలో సుమారు 50 నుంచి 60 ఆంజనేయస్వామి ఆలయాలు ఉన్నాయి. ఇవి చాలా విశిష్టమైన దేవాలయాలు. పూర్వం మా ఊరిలో 200 బ్రాహ్మణ కుటుంబాలు ఉండేవి. ఆ బ్రాహ్మణులు నివసించిన ఇంటి పక్కనే ఒక దేవాలయం నిర్మించుకున్నారు. కొన్నేళ్ల తర్వాత వారంతా ఇక్కడి నుంచి వెళ్లిపోయారు. గ్రామంలో ఉండేవారు వారి ఇంటి పక్కన ఉండే ఆంజనేయస్వామి వారికి నిత్యం పూజలు చేసి అనుగ్రహం పొందుతారు. హనుమాన్ జయంతి రోజు ఎంతో వైభవంగా జయంతిని జరుపుకుంటాం." - కిషన్ శర్మ, వెల్లుల్ల గ్రామ పూజారి
శాపానికి ఉపశమనం- ఆంజనేయ స్వామి జననం- హనుమంతుడి జన్మ రహస్యం తెలుసా?
మంగళవారం హనుమాన్ జయంతి- అంజన్నకు ఇవి సమర్పిస్తే అన్నింటా విజయమే!
