Errabelli Dayakar Rao on BRS in Assembly Elections : అసెంబ్లీ ఎన్నికల్లో తాను ఓడిపోతానని తనకు ముందే తెలుసని మాజీ మంత్రి ఎర్రబెల్లి దయాకర్ రావు తెలిపారు. ఎన్నికలకు మూడు నెలల ముందే శాసన సభ సీటు మార్చాలని మాజీ సీఎం కేసీఆర్‌ను కోరానని చెప్పారు. 40 సీట్లు మాత్రమే బీఆర్ఎస్ గెలుస్తుందని, తన స్థానంతో పాటు మరో 20 స్థానాలు కూడా మార్చాలని గులాబీ అధినేతకు ముందే చెప్పానని పేర్కొన్నారు. ప్రజల అభిప్రాయం తనకు తెలుసని వ్యాఖ్యానించారు. 30 వేల నుంచి 50 వేల భారీ మెజార్టీతో బీఆర్ఎస్ అభ్యర్థి సుధీర్‌ కుమార్‌ ఎంపీ ఎన్నికల్లో గెలుస్తారని ధీమా వ్యక్తం చేశారు. ఇవాళ వరంగల్‌లోని బీఆర్ఎస్ పార్టీ కార్యాలయంలో నిర్వహించిన మీడియా సమావేశంలో ఆయన మాట్లాడారు.
ఎన్నికల తర్వాత హామీలపై చేతులెత్తేస్తారు : రెండో స్థానం కోసం కాంగ్రెస్, బీజేపీ పోటీ పడుతోందని ఎర్రబెల్లి దయాకర్ రావు జోస్యం చెప్పారు. వరంగల్‌ను కేసీఆర్ అద్భుతంగా తీర్చిదిద్దారని కొనియాడారు. బీఆర్ఎస్ హయాంలో మిషన్‌ భగీరథ ద్వారా ఇంటింటికీ తాగునీరు ఇచ్చారని, కాంగ్రెస్ వస్తే ఏదో లాభం జరుగుతుందని ప్రజలు మోసపోయారని అన్నారు. ఆ పార్టీపై ప్రతీకారం తీర్చుకునేందుకు ప్రజలు సిద్ధమయ్యారని ఉద్ఘాటించారు. ఆగస్టు 15లోపు స్థానిక సంస్థలు సహా అన్ని ఎన్నికలు పూర్తవుతాయని, తర్వాత కాంగ్రెస్ ఇచ్చిన హామీలు అమలు చేయకుండా ఆ పార్టీ నేతలు చేతులెత్తేస్తారని విమర్శించారు.
ఆ ఎమ్మెల్యేలను ప్రజలు తరిమికొడతారు : అంతకుముందు మహబూబాబాద్ జిల్లా తొర్రూరు పట్టణ కేంద్రంలోని బీఆర్ఎస్ కార్యాలయంలో నిర్వహించిన మీడియా సమావేశంలో ఎర్రబెల్లి దయాకర్ రావు మాట్లాడారు. ఆరు నెలల్లో కాంగ్రెస్ ప్రభుత్వం కూలిపోతుందని వ్యాఖ్యానించారు. ఎన్నికల తర్వాత సీఎం రేవంత్ రెడ్డి ఇచ్చిన హామీలు నెరవేర్చకపోతే గ్రామాల్లో ప్రజలందరూ కాంగ్రెస్ ఎమ్మెల్యేలను తరిమికొడతారని అన్నారు. ఆ పరిస్థితుల్లో ఆ పార్టీ ఎమ్మెల్యేలు బీఆర్ఎస్, బీజేపీలో చేరుతారని జోస్యం చెప్పారు. బీఆర్ఎస్ కార్యకర్తలు అప్రమత్తంగా ఉండాలని, మహబూబాబాద్లో గులాబీ పార్టీ గెలుపు కోసం కృషి చేయాలని పిలుపునిచ్చారు.
'అసెంబ్లీ ఎన్నికల్లో నేను ఓడిపోతానని నాకు తెలుసు. కేసీఆర్కు కూడా అసెంబ్లీ స్థానాలు మార్చాలని చెప్పా. 30 వేల నుంచి 50 వేల భారీ మెజార్టీతో సుధీర్‌ కుమార్‌ ఎంపీ ఎన్నికల్లో గెలుస్తారు. కాంగ్రెస్ హామీలు అమలు కాకపోతే ప్రజలే బుద్ధిచెబుతారు'- ఎర్రబెల్లి దయాకర్‌రావు, మాజీ మంత్రి
