How To Get Car Subscription : మనలో చాలా మందికి కార్లు అంటే చాలా ఇష్టం ఉంటుంది. కానీ కారు కొనేంత స్తోమత వారికి ఉండదు. ఇలాంటి వారి కోసమే ప్రముఖ ఆటోమొబైల్ కంపెనీలు సబ్స్క్రిప్షన్ ప్లాన్లను అందిస్తున్నాయి. వీటి ద్వారా మీకు నచ్చిన కారును నిర్దిష్ట కాలం పాటు వాడుకోవచ్చు. దీని కోసం మీరు ప్రతినెలా నిర్దిష్ట మొత్తాన్ని చెల్లిస్తే సరిపోతుంది. ఇది ఏదో చాలా బాగుంది కదూ. మీరు కనుక కార్ లవర్ అయితే, ఈ అవకాశాన్ని ఉపయోగించుకుని, నెలకో కొత్త కారులో హాయిగా తిరగవచ్చు.
డిపాజిట్ ఎంత చేయాలి?
ప్రముఖ ఆటోమొబైల్ కంపెనీలు అన్నీ కార్ సబ్స్క్రిప్షన్ ప్లాన్లను అందిస్తున్నాయి. మీరు ఎంచుకునే మోడల్ ఆధారంగా ఈ డిపాజిట్ మొత్తం మారుతుంది. అయితే కార్ సబ్స్క్రైబ్ చేసుకోవడానికి ముందుగా కొంత మొత్తాన్ని డిపాజిట్ చేయాల్సి ఉంటుంది. లేదా డౌన్ పేమెంట్ చెల్లించాల్సి వస్తుంది. తరువాత మీరు కోరుకున్నంత కాలానికి నెలనెలా ఫీజు చెల్లించాల్సి ఉంటుంది. అంతే సింపుల్.
కార్ సబ్స్క్రిప్షన్ బెనిఫిట్స్!
మీకు నచ్చిన కారును సబ్స్క్రైబ్ చేసుకోవచ్చు. దీనిని మీకు నచ్చినప్పుడు వదులుకోవచ్చు కూడా. కార్ సబ్స్క్రైబ్ చేసుకున్న తరువాత మీకు రోడ్ సైడ్ అసిస్టెన్స్ లభిస్తుంది. మీరు ప్రస్తుతం వాడుతున్న మోడల్ను వదులుకొని, కొత్త మోడల్కు అప్గ్రేడ్ చేసుకోవడానికి వీలవుతుంది.
కారు మెయింటెనెన్స్, ఇన్సూరెన్స్, ట్యాక్స్లు అన్నీ మీరు చెల్లించే నెలవారీ సభ్యత్వ రుసుములోనే కవర్ అయిపోతాయి. కనుక ఎక్స్ట్రా ఫీజు కట్టాల్సిన పని ఉండదు. యూఎస్, యూరోప్ల్లో ఇది బాగా పాపులర్ అయ్యింది. ఇండియాలో కూడా ఈ కార్ సబ్స్క్రిప్షన్ ప్లాన్ క్రమంగా ప్రాచుర్యం పొందుతోంది.
Car Subscription Vs Car Loan
కార్ సబ్స్క్రిప్షన్ : సింపుల్గా చెప్పాలంటే, కారును నెలవారీగా అద్దెకు తీసుకోవడాన్ని కార్ సబ్స్క్రిప్షన్ అని అంచారు. మీరు నెలవారీగా చెల్లించే రుసుములోనే కారు నిర్వహణ ఖర్చులు కవర్ అయిపోతాయి. మీకు అయ్యే అదనపు ఖర్చులు - పెట్రోల్/డీజిల్, క్లీనింగ్ ఛార్జీలు మాత్రమే. పైగా మీరు తక్కువ దూరాలు మాత్రమే ప్రయాణిస్తే, సబ్స్క్రిప్షన్ ఛార్జీలు కూడా బాగా తగ్గుతాయి. ఎలా అంటే, మీరు ప్రతినెలా ఎన్ని కిలోమీటర్లు ప్రయాణిస్తారో ముందే చెప్పి, తక్కువ ధరకే సబ్స్క్రిప్షన్ ప్లాన్ తీసుకోవచ్చు. మీరు కనుక ఎలక్ట్రిక్ కారును సబ్స్క్రైబ్ చేసుకుంటే తెల్లని బోర్డ్పై నల్లని అక్షరాలతో కార్ ప్లేట్ ఇస్తారు. లేదా పచ్చని బోర్డ్పై తెల్లని అక్షరాలు ఉండే కార్ ప్లేట్ ఇస్తారు.
కార్ లోన్ : కార్ లోన్ అనేది చాలా పెద్ద తతంగం. మీరు బ్యాంకులకు ష్యూరిటీ ఇచ్చి రుణాలు తీసుకోవాల్సి ఉంటుంది. డీలర్లకు మొత్తం డబ్బులు ఇచ్చి కారును కొనుగోలు చేయాల్సి ఉంటుంది. దీని వల్ల మీపై ఒకేసారి పెద్ద ఎత్తున ఆర్థిక భారం పడుతుంది. పైగా బ్యాంకులకు వడ్డీ చెల్లించాల్సి ఉంటుంది. లేటెస్ట్ మోడల్ కార్లకు అప్గ్రేడ్ కావడం కూడా కష్టమవుతుంది. పైగా ఇన్సూరెన్స్, మెయింటెనెన్స్, రోడ్ సైడ్ అసిస్టెన్స్, టాక్స్ల భారం కూడా మీదే పడుతుంది.
భారతదేశంలో కార్ సబ్స్క్రిప్షన్ తీసుకోవడం ఎలా?
ఇండియాలో కార్ సబ్స్క్రైబ్ చేసుకోవాలంటే పాన్ కార్డ్, ఆధార్ కార్డ్, డ్రైవింగ్ లైసెన్స్, ఇన్కం ప్రూఫ్ అన్నీ సమర్పించాల్సి ఉంటుంది. ప్రైవేట్ కొనుగోలుదారుగా/ బిజినెస్ ఓనర్గా సబ్స్క్రిప్షన్ తీసుకుంటే మీ బ్యాంక్ స్టేట్మెంట్లు, ఐటీ రిటర్నులు చూపించాల్సి ఉంటుంది. ఒక వేళ కంపెనీ పేరు మీదుగా తీసుకుంటే, సదరు కంపెనీకి చెందిన గత ఆరు నెలల లాభ, నష్టాల స్టేట్మెంట్ను కూడా సమర్పించాల్సి ఉంటుంది.
కార్ సబ్స్క్రిప్షన్ ప్యాకేజ్లో ఏమేమి ఉంటాయి?
కార్ సబ్స్క్రిప్షన్ ప్యాకేజీలో చాలా వరకు గవర్నమెంట్ పేమెంట్స్, రోడ్ సైడ్ అసిస్టెన్స్, సర్వీస్ ప్యాకేజీలు, ముందస్తు లీజ్ ముగింపునకు సంబంధించిన క్లాజ్లు ఉంటాయి. ఒక వేళ నిర్దిష్ట పరిమితికి మించి ఎక్కువ కిలోమీటర్లు ప్రయాణిస్తే, అందుకు అదనపు ఛార్జీలు కూడా చెల్లించాల్సి వస్తుంది.
Car Subscription Vs Car Rental
కార్ సబ్స్క్రిప్షన్ అనేది నెలవారీగా ఉంటుంది. దీనికి ముందుగానే నిర్దిష్ట మొత్తం చెల్లించాల్సి ఉంటుంది. కార్ రెంటల్ అనేది తక్షణ అవసరాల కోసం ఉపయోగపడే పద్ధతి. అంటే ట్రావెల్ ఏజెన్సీ నుంచి కారును అద్దెకు తీసుకుని స్వల్పకాలానికి వాడుకోవచ్చు. సాధారణంగా కొన్ని రోజులు లేదా కొన్ని వారాల ప్రయాణాల కోసం కారును అద్దెకు తీసుకుంటూ ఉంటారు. కార్ సబ్స్క్రిప్షన్తో పోలిస్తే, అద్దెకు తీసుకున్న కారుకు ఎక్కువ డబ్బులు చెల్లించాల్సి వస్తుంది.
ఇండియాలో కార్ సబ్స్క్రిప్షన్ ప్లాన్స్ అందిస్తున్న ఆటోమొబైల్ కంపెనీలు ఏవి?
భారత్లో ప్రధానంగా మారుతి సుజుకి, మహీంద్రా, హ్యుందాయ్, ఎమ్జీ, నిస్సాన్, టయోటా కంపెనీలు కార్ సబ్స్క్రిప్షన్ ప్యాకేజీలను అందిస్తున్నాయి.
రూ.2 లక్షల్లో మంచి బైక్ కొనాలా? టాప్-10 పవర్ఫుల్ మోడల్స్ ఇవే!
టాటా, మారుతి కార్లపై భారీ ఆఫర్స్ - ఆ మోడల్పై ఏకంగా రూ.1.53 లక్షలు డిస్కౌంట్!
