ସୁବର୍ଣ୍ଣପୁର: ପିଲାଙ୍କୁ ପାଠ ପଢାଇଲେ ଜିଲ୍ଲାପାଳ। ଖାଲି ପଢାଇ ନଥିଲେ ପିଲାଙ୍କୁ ସାମାଜିକ ଓ ଇଂରାଜୀ ବିଷୟ ଉପରେ ବିଭିନ୍ନ ପ୍ରଶ୍ନ ପଚାରିଥିଲେ । ସୁବର୍ଣ୍ଣପୁର ଜିଲ୍ଲାପାଳ ମନୀଷା ବାନାର୍ଜୀ ବିସିମୁଣ୍ଡା ଗାଁକୁ ଅଚାନକ ଗସ୍ତ କରି ପିଲାଙ୍କୁ ପାଠ ପଢାଇବା ସହ ବିଭିନ୍ନ ବିଷୟରେ ପଚାରିଥିଲେ।
ସେ ପ୍ରଥମେ ଅଙ୍ଗନବାଡି କେନ୍ଦ୍ର ପରିଦର୍ଶନ କରି ଛାତ୍ରଛାତ୍ରୀଙ୍କ ସହିତ କଥାବାର୍ତ୍ତା ହୋଇଥିଲେ। ପରେ କେନ୍ଦ୍ରର କର୍ମୀ ଓ ସହାୟିକା ସହିତ ବିଭିନ୍ନ ବିଷୟରେ ଆଲୋଚନା କରିବା ସହିତ ଅଭାବ ଅସୁବିଧା ସମ୍ପର୍କରେ ପଚାରି ବୁଝିଥିଲେ। ପରେ ପାଖରେ ଥିବା ପ୍ରାଥମିକ ବିଦ୍ୟାଳୟକୁ ଯାଇ ଛାତ୍ରଛାତ୍ରୀଙ୍କୁ ପାଠ ପଢ଼ାଇଥିଲେ। ପିଲାଙ୍କୁ ସାମାଜିକ ଓ ଇଂରାଜୀ ବିଷୟରେ ବିଭିନ୍ନ ପ୍ରଶ୍ନ ପଚାରିଥିଲେ। ଜିଲ୍ଲାପାଳଙ୍କୁ ପାଖରେ ପାଇ ଛାତ୍ରଛାତ୍ରୀ ବେଶ ଖୁସି ହୋଇଥିଲେ।
ପ୍ରାଥମିକ ବିଦ୍ୟାଳୟର ଶିକ୍ଷକଙ୍କ ସହ ମଧ୍ୟାନ୍ନ ଭୋଜନ ଓ ଶିକ୍ଷକ ଛାତ୍ରଛାତ୍ରୀ ଅନୁପାତ ସମ୍ପର୍କରେ ଆଲୋଚନା କରିଥିଲେ। ଏହାବ୍ୟତୀତ ଜିଲ୍ଲାପାଳ ଫେରିବା ସମୟରେ ପ୍ରାଥମିକ ସେବା ସମବାୟ ସମିତି ଯାଇ ଚଳିତ ଖରିଫ ଋତୁ ଧାନ ବିକ୍ରି ସମ୍ପର୍କରେ ଚାଷୀଙ୍କ ସହିତ ଆଲୋଚନା କରିଥିଲେ। ଚାଷୀ ଇ-ଟୋକନ ବ୍ୟବସ୍ଥାରେ ହେଉଥିବା ଅସୁବିଧା ସମ୍ପର୍କରେ ଜିଲ୍ଲାପାଳଙ୍କ ଦୃଷ୍ଟି ଆକର୍ଷଣ କରିଥିଲେ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
