ସୁବର୍ଣ୍ଣପୁର: ମହାଦେବ ପାଲି ଫାଣ୍ଡି ଅଧିନସ୍ଥ ଘୋଡାଧାର ଗାଁରେ ଏକ ହତ୍ୟାକାଣ୍ଡ । ଜମିବାଡି ବିବାଦରେ ଲାଗି ରହିଥିବା ପୂର୍ବ ଶତ୍ରୁତାକୁ କେନ୍ଦ୍ର କରି ଜଣେ ମହିଳାଙ୍କୁ ନିର୍ମମ ଭାବେ ହତ୍ୟା କରାଯାଇଥିବା ଅଭିଯୋଗ । ପ୍ରାଥମିକ ବିଦ୍ୟାଳୟ ନିକଟରେ ଧାରୁଆ ଅସ୍ତ୍ର ସାହାଯ୍ୟରେ ଗାଁର 50 ବର୍ଷିୟ ପାଂଜିସ୍ବରୀ ଲୁହାକୁ ବେକକାଟି ହତ୍ୟା କରାଯାଇଥିବା ବେଳେ ସ୍ବାମୀ କଟିଆ ଲୁହା ଓ ପୁଅ ମହେଶ୍ବର ଲୁହାକୁ ବି ଧାରୁଆ ଅସ୍ତ୍ର ସାହାଯ୍ୟରେ ଆକ୍ରମଣ କରାଯାଇଛି ।
ଜମିବାଡି ବିବାଦକୁ ନେଇ ଦୀର୍ଘଦିନ ହେବ ଗ୍ରାମର ଏକ ପରିବାର ସହ କଳହ ଲାଗିରହିଥିଲା । ଏହି କଳହ ଶନିବାର ମଧ୍ୟ ହୋଇଥିଲା । ଯାହାକୁ ନେଇ ପାଂଜିସ୍ବରୀଙ୍କ ପରିବାର ଲୋକେ ସ୍ଥାନୀୟ ମହାଦେବ ପାଲି ପାଣ୍ଡିକୁ ଅଭିଯୋଗ କରିବାକୁ ଯାଇଥିଲେ । ଅଭିଯୋଗ କରି ଫେରିବା ବାଟରେ ଯୋଜନା ମୁତାବକ ଆକ୍ରମଣ କରିବାକୁ ଗ୍ରାମର ଦୁର୍ଜ ଭଏନା, ପ୍ରହଲ୍ଲାଦ ବିଭାର, ସୁଦର୍ଶନ ଭଏନା, ନର ଭଏନା ଓ ଅଲେଖ ଜଗଦଲା ଗୋଷ୍ଠୀବଦ୍ଧ ଭାବେ ପାଂଜିସ୍ବରୀର ପରିବାର ଲୋକଙ୍କୁ ଆକ୍ରମଣ କରିଥିଲେ ।
ଘଟଣାସ୍ଥଳରେ ହିଁ ପାଂଜିସ୍ବରୀଙ୍କର ମୃତ୍ୟୁ ହୋଇଥିବା ବେଳେ ଗୁରୁତର ହୋଇ ପଡିଥିବା ତାଙ୍କ ସ୍ବାମୀ ଓ ପୁଅକୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ପାଂଜିସ୍ବରୀଙ୍କ ଘର ପାଖରେ ଥିବା ସରକାରୀ ଜମିକୁ କେନ୍ଦ୍ର କରି ଏହି ହତ୍ୟାକାଣ୍ଡ ହୋଇଛି ବୋଲି ପୋଲିସର ପ୍ରାଥମିକ ତଦନ୍ତରୁ ଜଣା ପଡିଛି । ପୋଲିସ ଘଟଣାସ୍ଥଳକୁ ପହଞ୍ଚି ପାଂଜିସ୍ବରୀଙ୍କ ଶବ ଜଗିଥିବା ବେଳେ ଏହି ହତ୍ୟାକାଣ୍ଡର ଅନୁସନ୍ଧାନ ଜାରି ରଖିଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
