ସମ୍ବଲପୁର: ରାଜ୍ୟରେ ବଢି ଚାଲିଛି ହାତୀ ଆତଙ୍କ। ସମ୍ବଲପୁର ଜିଲ୍ଲାରେ ହାତୀ ଆକ୍ରମଣରେ ଜଣଙ୍କ ମୃତ୍ୟୁ ହୋଇଛି । ଏ ଘଟଣା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ଲାଗିଥିବା ବେଳେ, ମୃତକଙ୍କ ପରିବାରକୁ କ୍ଷତିପୂରଣ ଦେବା ପାଇଁ ଦାବି ହୋଇଛି।
ସମ୍ବଲପୁର ଜିଲ୍ଲା କୁଚିଣ୍ଡା ଉପଖଣ୍ଡ ଅଧୀନସ୍ଥ ବାମରା ବ୍ଲକ ଗଡପୋଷ ଅଞ୍ଚଳରେ ହାତୀ ଆକ୍ରମଣରେ ସ୍ଥାନୀୟ ମହୁଳମୁଣ୍ଡା ଗାଁର ସୁନୀଲ ଏକ୍କା ନାମକ(45 ବର୍ଷ) ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଛି । ସେ ସୋମବାର ଦୁମେରମୁଣ୍ଡା ଗାଁରୁ ନିଜ ଗାଁ ମହୁଳମୁଣ୍ଡାକୁ ଯାଉଥିବା ବେଳେ 6 ଟିକିଆ ହାତୀପଲ ହାବୁଡରେ ପଡିଯାଇଥିଲେ । ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଛି । ଖବର ପାଇ ବନବିଭାଗ କର୍ମଚାରୀ ସେଠାରେ ପହଞ୍ଚି ତାଙ୍କ ମୃତଦେହକୁ ଉଦ୍ଧାର କରିଛି ।
ନିକଟରେ ସୁନ୍ଦରଗଡ ଜିଲ୍ଲାରେ ଗୋଟିଏ ରାତିରେ ଦୁଇ ଜଣଙ୍କୁ ଦନ୍ତା କଚାଡି ମାରିଥିବା ଘଟଣା ରାଜ୍ୟରେ ଚାଞ୍ଚଲ୍ୟ ସୃଷ୍ଟି କରିଥିଲା । ତା ପର ଦିନ କେନ୍ଦୁଝରରେ ମଧ୍ୟ ଜଣେ ମହିଳାଙ୍କୁ ଘୋଷାଡି ଆଣି ଦନ୍ତା କଚାଡି ମାରିଥିଲା । ଦିନକୁ ଦିନ ହାତୀ ଉପଦ୍ରବକୁ ନେଇ ଲୋକଙ୍କ ମନରେ ଭୟ ସୃଷ୍ଟି ହୋଇଛି।
ସମ୍ବଲପୁରରୁ ବାଦଶାହା ଜୁଶ୍ମନ ରଣା, ଇଟିଭି ଭାରତ
