ଭୁବନେଶ୍ବର: 5T ସଚିବଙ୍କ ହେଲିକପ୍ଟର ଯାତ୍ରାର ଖର୍ଚ୍ଚର ହିସାବ ନଦେଇ ଖସି ପାରିବେନି ରାଜ୍ୟ ସରକାର । କେନ୍ଦ୍ରୀୟ ଅନୁଦାନ ମଧ୍ୟ ହରିଲୁଟ ହେଉଛି । ଜନତା ତାର ହିସାବ କରିବେ ବୋଲି କହିବା ସହ ଏହି ମାମଲାରେ କେନ୍ଦ୍ରୀୟ ତଦନ୍ତର ଇସାରା ଦେଇଛନ୍ତି ବିଜେପି ରାଜ୍ୟ ସଭାପତି ମନମୋହନ ସାମଲ । ସିଧାସଳଖ କେନ୍ଦ୍ରୀୟ ତଦନ୍ତର କଥା ନକହି, କି’ଏ ତଦନ୍ତ କରିବ ଠିକ ସମୟ ଆସିଲେ, ଜାଣି ପାରିବେ ବୋଲି ମନମୋହନ କହଛନ୍ତି ।
ଆଜି ଗଣମାଧ୍ୟମରେ ପ୍ରତିକ୍ରିୟା ରଖି ମନମୋହନ ରାଜ୍ୟ ସରକାରଙ୍କ ଉପରେ ବର୍ଷିଛନ୍ତି । କହିଛନ୍ତି, ‘‘ନିଜ ଆଖିକୁ ଆଙ୍ଗୁଳି ଯିବନି, ରାଜ୍ୟ ସରକାର ତଦନ୍ତ କରିବେନି । ମନ୍ତ୍ରୀଙ୍କ ନାଁରେ ହେଲିକପ୍ଟର ବୁକ୍ ହେଉଛି, ହେଲେ ସଚିବ ବୁଲୁଛନ୍ତି ତାର ତନ୍ନ ତନ୍ନ ତଦନ୍ତ ହେବ । ବିଜେପି ଛିଣ୍ଡା କାଗଜର ମଧ୍ୟ ହିସାବ ନେବ । ସେମାନେ ୬୦୦ କୋଟିକୁ ୫୦ କୋଟି ବୋଲି ବିଧାନସଭାରେ ହିସାବ ଦେଇଛନ୍ତି । କେନ୍ଦ୍ର ଅନୁଦାନରୁ ଆସିଥିବା ୧୮ ଲକ୍ଷ ୮୩ ହଜାର କୋଟି ଲୁଟ୍ ହେଲାଣି । ଜନବିରୋଧୀ କି’ଏ ଲୋକ ଜାଣିଛନ୍ତି । ଆମ ବିରୋଧୀ ଦଳ ନେତାଙ୍କ ମାନସିକ ଭାରସାମ୍ୟ ନାହଁ ଯିଏ କହୁଛି ଏଭଳି ଦାୟିତ୍ୱହୀନ ସରକାରୀ ଦଳଠୁ ଆମେ କିଛି ଆଶା କରୁନାହୁଁ ।’’
ସୂଚନାଯୋଗ୍ୟ ଯେ, CMO (ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ) ଗସ୍ତ ନେଇ ବିଧାନସଭାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିବୃତି ରଖିଥିଲେ । କହିଥିଲେ, ‘‘ ମୋ ସରକାର ଲୋକଙ୍କ ସରକାର । ମୋ ସରକାର ସର୍ବଦା ଲୋକଙ୍କ ସମସ୍ୟା ସମାଧାନକୁ ଗୁରୁତ୍ବ ଦିଏ । କୋଭିଡ ସମୟରେ ୨ ବର୍ଷ ହେଲା ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠ ବନ୍ଦ ଥିଲା । ସେଥିପାଇଁ CMO ଅଧିକାରୀଙ୍କୁ ବିଭିନ୍ନ ସ୍ଥାନକୁ ଯାଇ ଅଭିଯୋଗ ଗ୍ରହଣ କରି ସମାଧାନ ଲାଗି ମୁଁ ନିର୍ଦ୍ଦେଶ ଦେଇଥିଲି । ସିଏମଓର ଅଫିସରମାନେ ଲୋକଙ୍କଠୁ ଅଭିଯୋଗ ପତ୍ର ଗ୍ରହଣ କରି ସମାଧାନ କରୁଛନ୍ତି । ଲୋକଙ୍କ ସମସ୍ୟା ସମାଧାନ ପାଇଁ CMO ଗତ ୬ ମାସରେ ରାଜ୍ୟର ୧୯୦ ସ୍ଥାନରେ ଲୋକଙ୍କୁ ଭେଟି ୫୭ ହଜାର ୪୪୨ ପିଟିସନ୍ ପାଇଥିଲା । ସେଥିରୁ ୪୩,୫୩୬ ପିଟିସନ୍ର ସମାଧାନ ହୋଇପାରିଛି । ୫୭ ହଜାର ପିଟିସନ ପାଇଁ ଲୋକଙ୍କୁ ମୁଖ୍ୟମନ୍ତ୍ରୀ ଅଭିଯୋଗ ପ୍ରକୋଷ୍ଠକୁ ଆସିବାକୁ ପଡ଼ିଥାନ୍ତା ।
ସେହିପରି ଏହି ଗସ୍ତ ସମୟରେ ସଚିବଙ୍କ ହେଲିକପ୍ଟର ବ୍ୟବହାର ପ୍ରସଙ୍ଗରେ ମଧ୍ୟ ସ୍ପଷ୍ଟୀକରଣ ଦେଇଛନ୍ତି ମୁଖ୍ୟମନ୍ତ୍ରୀ । ସେ କହିଛନ୍ତି, ହେଲିକପ୍ଟର ବ୍ୟବହାର ହୋଇ ନଥିଲେ ସାରା ରାଜ୍ୟ ବୁଲି ଅଭିଯୋଗ ଶୁଣାଣି କରିବାକୁ ଦେଢ ବର୍ଷ ସମୟ ଲାଗିଯାଇଥାନ୍ତା । ଗତ ସାଢେ ତିନି ବର୍ଷରେ ହେଲିକପ୍ଟର ବ୍ୟବହାର ବାବଦକୁ ସରକାର ୪୦ କୋଟି ଖର୍ଚ୍ଚ କରିଛନ୍ତି । ମାସିକ କୋଟିଏରୁ ଦେଢ କୋଟି ଟଙ୍କା ଏ ବାବଦରେ ଖର୍ଚ୍ଚ ହେଉଥିଲା ।
ଇଟିଭି ଭାରତ, ଭୁବନେଶ୍ବର
