ଭଦ୍ରକ : ଭଦ୍ରକ ଜିଲ୍ଲା ଧାମନଗର ବ୍ଲକ ଧୁଷୁରୀ ଥାନା ଅନ୍ତର୍ଗତ ଅର୍ଜୁନପୁର ପଞ୍ଚାୟତ ଦେଇ ପ୍ରବାହିତ ବୈତରଣୀ ନଦୀ ବନ୍ଧ ଉପରେ ଅଟୋ ଓଲଟି ସାତ ଜଣ ଗୁରୁତର ହୋଇଛନ୍ତି । ସମସ୍ତ ଆହତଙ୍କୁ ମେଡିକାଲରେ ଭର୍ତ୍ତି କରାଯାଇଛି । ଖବର ଅନୁଯାୟୀ ଅର୍ଜୁନପୁର ପଞ୍ଚାୟତ ନିକଟସ୍ଥ ବାଲିପାଟଣା ଗ୍ରାମଦେଇ ଯାଇଥିବା ବୈତରଣୀ ନଦୀ ବନ୍ଧ ଉପରେ ଏକ ଯାତ୍ରୀବାହି ଅଟୋ ଯାଉଥିଲା । ହେଲେ କୌଣସି କାରଣରୁ ଅଟୋଟି ଭାରସାମ୍ଯ ହରାଇ ନଦୀ ବନ୍ଧ ତଳକୁ ଓଲଟି ପଡିଥିଲା । ଫଳରେ ସେଥିରେ ଥିବା 5 ଜଣ ମହିଳା, ଜଣେ ଛୋଟ ପିଲା ସହ ଡ୍ରାଇଭରକୁ ମିଶାଇ ମୋଟ 7ଜଣ ଗୁରୁତର ଭାବେ ଆହତ ହୋଇଥିଲେ ।
ଏହାଦେଖି ସ୍ଥାନୀୟ ଲୋକେ ସମସ୍ତ ଗୁରୁତର ଆହତ ମାନଙ୍କୁ ଉଦ୍ଧାର କରି ପ୍ରଥମେ ଧୁଷୁରୀ ପ୍ରାଥମିକ ଚିକିତ୍ସାଳୟକୁ ସ୍ଥାନାନ୍ତରିତ କରିଥିଲେ । ତେବେ ସେଠାରେ ସମସ୍ତଙ୍କ ସ୍ୱାସ୍ଥ୍ୟବସ୍ଥା ସଙ୍କଟାପନ୍ନ ହେବାରୁ, ସମସ୍ତଙ୍କୁ ଭଦ୍ରକ ଜିଲ୍ଲା ମୁଖ୍ଯ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଥିଲା । ଦୁଇ ଜଣଙ୍କ ଅବସ୍ଥା ଶୋଚନୀୟ ଥିବାରୁ ସେମାନଙ୍କୁ କଟକ ବଡ଼ ମେଡ଼ିକାଲକୁ ସ୍ଥାନାନ୍ତରିତ କରାଯାଇଛି ବୋଲି ସୂଚନା ମିଳିଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
